140蚊食酒店自助餐!綠茶甜品多到眼花
140蚊食酒店自助餐!綠茶甜品多到眼花
相關信用卡:

140蚊食酒店自助餐!綠茶甜品多到眼花

發表日期: 2016 年 07 月 26 日 更新日期: 2016 年 07 月 26 日 優惠攻略飲食
作者:Yvone 二方

聽說$140就可以食到酒店自助餐,仲要係綠茶主題,有勁多綠茶嘢,綠茶控嘅你係唔係好心動呢?今次我就出動同大家豁...豁出去,豁出個胃同大家試吓性價比係唔係咁高,綠茶嘢係唔係真係有咁多先!

今次要去嘅就係百樂酒店嘅「綠茶花園」下午茶自助餐,百樂酒店位於尖沙咀,喺港鐵站行過去都係大約5分鐘嘅距離,好方便㗎!食下午茶自助餐嘅cafe位置位於酒店4樓,由下午3點鐘食到5點鐘,食2個鐘都夠晒㗎喇!嗰日我2點9左右去到,已經有唔少人排緊隊,睇落真係好受歡迎咁!

事不宜遲,我哋睇吓自助餐嘅主角-食物!首先我哋巡吓個場睇吓有啲咩先!唔好以為佢叫「綠茶花園」下午茶自助餐,係得綠茶甜品呀!其實佢同普通自助餐一樣,都有壽司、刺身、熱食,只係仲有好多綠茶甜品咁解啫!下面有大量食物圖附評語,我覺得值得試嘅款式會喺側邊打星號!


▲有啲壽司、三文治同埋多士,種類唔算多,極肚餓嘅可以考慮吓,不過我就會留肚食甜品喇~


▲刺身我去到望時得三文魚同埋希靈魚,種類少,有啲失望,不過理智上話我知甜品先係重點!


▲海鮮有3款,有青口有螺有蝦,以下午茶來講,算OK啦!啲蝦好快好俾人掃晒。


▲熱食方面都有咖喱。


▲除咗咖喱,仲有啲中式點心(後面黃色嘅南瓜蓉餅),有pizza,有菜,有煮青口,有炒飯,都不過不失嘅。青口好似細隻左啲,要食多幾隻補數,哈哈!


綠茶控注意!除咗甜品,熱食同沙律分別都有綠茶嘢㗎!個人覺得一定要試吓綠茶芝士雞翼,初頭聽到綠茶雞翼覺得會好苦,點知出來個效果又出奇哋夾喎。個質感有啲似燒雞翼再配上芝士,個芝士加強咗個口感,而且芝士同綠茶陣味都幾夾,陣綠茶味係偏甜嘅味道,絕對唔苦,幾特別!而沙律方面嘅代表就有綠茶藜麥沙律,感覺有點似有淡淡綠茶味嘅啫喱,藜麥係健康食品,高纖,不含膽固醇及麩質,而且低脂低升糖值,未試過嘅朋友可以試吓!


▲✭熱食一定要試嘅綠茶芝士雞翼,雖然佢個賣相唔太討好,不過味道係幾特別,係有淡淡嘅綠茶嘅燒雞翼咁,係有驚喜嘅。呢個雞翼好快就俾人夾晒,記得一開始去夾咗先~


▲沙律有綠茶藜麥沙律,遠睇個樣有啲奇怪。


▲近啲睇,其實係啫喱狀,啫喱入面有藜麥,藜麥本身冇咩味,不過就幾有咬口,而啫喱本身就有好淡嘅綠茶味,可以試吓撈埋其他沙律或配菜食。

去到重點嘅綠茶甜品,你睇吓真係有好多好多選擇,有各式各樣嘅蛋糕、慕絲、糕點,淨係要揀第一件要食啲咩已經覺得好難喇!咁就等我逐件試過嘅講吓啦!


▲啲綠茶甜品已經以整齊嘅步伐列隊,等緊你夾走佢~由左至右:綠茶林明頓、日式紅豆綠茶慕絲蛋糕、綠茶豆腐芝士餅、日式和菓子、綠茶朱古力蛋糕


▲由左至右:綠茶慕絲酥皮卷、法式歌劇蛋糕、藍莓芝士餅、綠茶沙巴翁泡芺、十勝紅豆綠茶卷


▲綠茶慕絲酥皮卷,我覺得好硬好乾...而且入面cream唔多...好乾


▲✭十勝紅豆綠茶卷,唔錯!我個like係俾cream入面啲紅豆嘅!個蛋糕本身都夠軟,個cream唔太甜,唔會掩蓋咗cream入面啲紅豆味,紅豆都豐富咗蛋糕嘅口感,值得試。


▲綠茶朱古力蛋糕,正正常常,夠朱古力味的,加咗綠茶底所以唔會有好漏嘅感覺。


▲綠茶林明頓,佢表面用咗白朱古力去包住,所以咬落去會覺得有個硬硬地嘅殻咁,仲食到好重嘅椰絲味,本身嘅綠茶味就唔係好出。


▲✭法式歌劇蛋糕,一定要試!有好重好香嘅咖啡味,上面粒咖啡豆其實係朱古力,中和番咖啡個苦味,成件事剛剛好。


▲綠茶豆腐芝士餅,又唔漏喎!可能加咗豆腐,只係有淡淡嘅芝士味。


▲✭日式紅豆綠茶慕絲蛋糕,呢個個紅豆好好食呀!


▲✭綠茶沙巴翁泡芺,鍾意cream嘅人一定會鍾意(暗暗舉手)。切開證明俾大家睇真係滿滿嘅綠茶cream來㗎,唔係空氣!


▲鍾意食一杯杯小甜品嘅,呢度有一個雪櫃嘅選擇。我就揀咗綠茶慕絲杯同埋北海道牛乳杯食,之後聽番話綠茶桂花糕唔錯,嗚呀!我好鍾意食桂花糕㗎...如果有人食完,話番俾我知好唔好食吖!


▲綠茶慕絲杯,一般般,正常味道。


▲北海道牛乳杯,鍾意牛奶嘅我覺得冇乜奶味,陣綠茶味都有點怪怪的。


▲✭即焗綠茶梳乎厘,一定一定要食!因為即焗嘅關係,夠晒熱辣辣軟綿綿,然且綠茶味亦都好夠!好多人排㗎~要預時間~


▲蜂蜜綠茶。坐坐下見好多人都拎呢杯嘢,個色我望落覺得好似藥水,但味道絕對正常!係真係綠茶加蜜糖味,唔會好甜。亦有其他紅茶嗰啲攞~


▲有即整嘅pancake,可惜我個胃已經食唔落。我見有人攞到係綠茶味綠色嘅crepe咁。


▲仲有綠茶綿綿冰,綠茶味好重,唔錯的!Topping可以自己加,如果可以有埋煉奶嗰啲落就好喇!


▲仲有爆谷機!唔使去戲院都食到啦!


▲又唔係成場都係綠茶嘅,都有啲唔係綠茶嘅甜品,好似呢個自助班戟咁,㩒個製佢就會自己碌出來㗎喇!其實仲有朱古力噴泉,有生果㗎!


▲新鮮整出來熱辣辣又夠軟,好香蛋味,加埋糖漿好好味!


▲自助餐又點少得雪糕呢!下午茶自助餐就得雀巢,不過有其他咁多甜品,呢點我收貨。


總括來講,自助餐嘅重點係綠茶甜品,如果你係諗住去食好多好多魚生嘅就錯重點喇!如果你係綠茶控,不妨去試一試,呢個價錢任食真係幾抵,而且甜品質素普遍唔錯!

如果鍾意綠茶但又唔大食嘅話,除咗自助餐,酒店仲有推出「綠茶の最下午茶」,一個盒入面有唔同嘅綠茶糕點,砌得靚靚。另加$30仲可以升級至「尊尚下午茶」,可以額外尊享煙三文魚草莓沙律,仲可以配搭迷你和牛竹碳漢堡或MOVENPICK雪糕伴窩夫,最啱一班朋友約埋high個tea打卡~


依家喺百樂酒店嘅Facebook 專頁,列印咗呢張優惠券出來,就可以有7折優惠。下午茶自助餐星期一至五成人原價$178,計番7折加一都係$142.4。140蚊就可以食到酒店自助餐,唔好話唔著數!


▲去番百樂酒店嘅專頁,可以列印呢張coupon,咁就有番7折優惠!〈傳送門〉


為咗方便大家,同大家整理咗個價錢表:
 


想抵上加抵,由2016年7月15日至9月14日,憑渣打/MANHATTAN信用卡於本地,海外零售簽賬及網上簽賬滿指定金額,當中全港食肆簽賬可享回贈:

累積任何合資格簽賬(該階段):HK$20,000 或以上
當中合資格本地食肆簽賬之現金回贈#比率:18%
最高現金回贈(該階段):HK$480
最高現金回贈(整個推廣期):HK$960

累積任何合資格簽賬(該階段):HK$10,000-$19,999
當中合資格本地食肆簽賬之現金回贈#比率:8%
最高現金回贈(該階段):HK$240
最高現金回贈(整個推廣期):HK$480

累積任何合資格簽賬(該階段):HK$5,000-$9,999
當中合資格本地食肆簽賬之現金回贈#比率:8%
最高現金回贈(該階段):HK$120
最高現金回贈(整個推廣期):HK$240

推廣期
階段1:2016年7月15日至8月14日
階段2:2016年8月15日至9月14日

以自助餐星期一至五價錢(七折後)計算,
如累積任何合資格簽賬(該階段)HK$20,000 或以上,今次自助餐嘅回贈就係$142.4 x 18%=$25.632
如累積任何合資格簽賬(該階段)HK$5,000-$9,999,今次自助餐嘅回贈就係$142.4x8%=$11.392

信用卡優惠詳情可以去番〈呢度〉睇。