10件你出電話連數據Plan前要知道的事
更新日期: 2012 年 11 月 23 日
依家香港差唔多每人都有兩部電話，但係我識一部份朋友佢地仲比緊成300蚊電話費，貴到丫！所謂「知識就是力量」，你知多啲，咪可以比少啲囉。
1.) 留意計畫數據的上網速度
我有朋友啱啱出左Smartone $68電話計劃連無限3G數據，仲要話無合約，我心諗有冇咁筍呀？咁我有日行過旺角又見到有Smartone擺街就問下啦，結果發現原來係限速架，得384kbps咋，即係幾慢？昨日我幫朋友裝個WhatsApp時用左成2分鐘呀……簡直燃燒我既生命呀！
個Sales話係3G呀，最初期3G速度係咁上下架，嘩，咁都得？3G現時最高速可以去到7.2甚至14.4Mbps，1M = 1000kb，咁佢Smartone呢個Plan速度有幾快條數好易計啫！呢啲Plan係比啲淨係玩WhatsApp嘅人架(好多女生都係啦)。不過Smartone都算有人性，唔洗簽約，等你頂唔順可以隨時走。
2.) 出「街Plan」可以做到一啲門市冇的筍價月費
其實應該好多人都知架啦，係各電訊商門市出 Plan，冇係街出（街霸）咁抵。點解會咁？因為電訊商又要搶客，又想賺到盡。呢種情況係價格歧視(Price Discrimination)，歧視啲資訊不足人仕。仲有如果你『帶冧把過台』就仲平。
電訊商門市出 Plan，冇係街出（街霸）咁抵
3.) 電話儲值卡都可以『帶冧把過台』
好多時電訊商會比優惠去搶客。若你純想開個新冧把，但又想有優惠，你只要去買張電話儲值卡就得嘞。但記住未到轉會日期之前，唔好「用乾」張卡喎！否則你張卡就打柴（個冧把會冇左）帶唔到架啦。
仲有！知唔知電話卡邊度全港最平？……登登，係有「香港矽谷」之稱嘅深水埗鴨尞街，啲電話卡我估應該係電訊商平價拆比佢地（谷大表面嘅市場佔有率），全部都差唔多做到半價甚至更平！舉例，一張原價$48嘅PCCW儲值卡，佢地只賣$18-25 蚊咋。對耐唔耐就爆分鍾嘅人就最啱啦！記住格下價先呀！
深水埗鴨尞街電話卡超平，耐唔耐就爆分鍾既人最啱！
4.) 留意計畫是否當超過指定數據用量之後要限速（公平用量條款）
話說我個3台，逢星期三有免費睇場戲推廣，啱哂我呢類半退休人士，有日佢地打黎叫我續約，所有野不變，但冇左3影院，而數據佢就話任用。任用？？？我細細個阿媽就教到大，邊有咁多正妹唔著衫週街走？新聞都勁賣公平使用原則，我於是問佢：
我：「無限即係幾多丫？」
客服：「先生，係無限用架！」
我：「（嬲嬲地）無限咁即係幾多呀？」
客服：「無上限架！但用多過2Gb之後要根據公平使用原則要限速呀」
其實呢個係德政，事關好多人（包括鄙人）都一定試過用爆 Data，用佢呢隻Plan就唔會話用爆啦。
5.) 用爆Data可以買點數
用爆Data張單爆貴點算？如果真係爆好多，我有朋友試過要比成千銀！呢個時候，記住打去客服嘈佢呀，通常佢都會比番個折你。
如果係喺該月未截數之前就仲簡單，可以打去問客服，原來有臨時Data數據買（3仔咋，其他唔知，不過都可以試試丫？），我果次爆左200Mb左右，結果大概比左$250大元找數，如果比正價逐Kb計就要成$1000蚊丫！至於引致我爆Data兇手，應該係重裝機後，Google Play自動更新左好多Apps，真大意！平時我一定會關哂所有自動更新，或者set做只用 wi-fi 下載。
其實大家應該裝番個App(Search: Data Usage)監察Data用量（Android 4.0有內置監察選項）。
6.) 記住落實簽單前，問Sales有冇其他額外著數
佢地為左簽成張單，好多時會有現金卷送架！
7.) 即使係喺門市，都可以試下問佢地有冇啲平Plan
好似我依家用緊一個3Data Plan，佢地冇公佈出黎，係要問先會有架——$51，無限1Gb（即係先前第4點所講果隻呀）。我點知有呢個Plan？哈哈，知識就是力量！
8.) 連機上台Plan點計抵唔抵
好多人唔識計連機(iPhone等)Plan究竟抵唔抵，其實好簡單計少少數就得啦。計法是，先計總款額，減去iPhone二手回收價，再去計每月實質月費：
好似以上計劃1咁，其實我都夠用，16Gb上台價$3,660，合約期24個月。
月費($138+36+12)*24=$4,464，再加機價$3,660，2年合共成本為4464+3660=$8124，現時回收價$6200(參考網上報價)，
淨月費=8124-6200=$1,924，再除開合約期 1924/24 = 每月$80.17。
同我現時月費一樣（見上面第4點），但我齋續台Plan反而仲多Data用！
以後你自己識計啦？
9.) 未滿約都可以帶冧把過台架
若未滿約，但又有d筍Plan想參加，可以照同Sales講，佢地其實可以幫你帶住去張臨時卡（新冧把），到你舊約滿後，就可以將呢個Plan轉番去你原有冧把啦。
10.) WhatsApp 其實可以用不同佢自己既冧把既
方法是：
1）先用冧把A(你想表示於人前的冧把)的sim卡開 Whatsapp，用來認證電話冧把（呢張卡其實有冇Data都得，因為可以用wifi下載 Whatsapp）。
2）之後換一張你想用的Data卡入去該部電話（或平板），Whatsapp唔需要再認證。
3）若你之後要重裝你的 Android，需要再輸入電話冧把，便輸入你在步驟1輸入的冧把（你想表示於人前的冧把）。
**iOS 我就唔知得唔得啦。