點買先至抵?信用卡超市優惠 Vs Apple Pay優惠
點買先至抵?信用卡超市優惠 Vs Apple Pay優惠
相關信用卡:

點買先至抵?信用卡超市優惠 Vs Apple Pay優惠

發表日期: 2016 年 09 月 28 日 更新日期: 2016 年 09 月 28 日 現金回贈信用卡購物
作者:積克

銀行有好多唔同嘅信用卡優惠,有專門同超市合作嘅,又有Apple Pay嘅,而超市又接受Apple Pay畀錢,咁應該用超市優惠還是Apple Pay優惠著數啲呢?今次我就同大家研究下呢個問題。當然,要用Apple Pay,首先你要有部iPhone。

超市優惠

百佳 X 匯豐
優惠期至:10月31日
優惠:
於百佳超級市場、FUSION、TASTE、INTERNATIONAL、GOURMET、GREAT FOOD HALL、SU-PA-DE-PA超市部單一簽賬滿$500送$50現金券;以手機付款額外送$10,合共$60現金券,每位持卡人每日只可獲贈現金券一次。
額外獎賞比率:10% / 12% (手機付款)

百佳 X 銀聯
優惠期至:10月16日
優惠:
於PARKnSHOP.com單次購物滿$800即減$50,於百佳APP單次購物滿$800即減$50及送$50 APP電子現金券下次使用,每個PARKnSHOP.com帳戶可享有一次折扣優惠。
​額外獎賞比率:6.25% / 12.5% (百佳APP)

一田超市 X 銀聯
優惠期至:2017年1月28日
優惠:
逢星期五以銀聯信用卡或提款卡簽賬滿$400,或以銀聯閃付卡簽賬滿$300,可獲$50一田現金禮券一張。每張銀聯卡每日限換現金禮券一張,每人每日限換3張。
額外獎賞比率:12.5% / 16.67% (銀聯閃付卡及銀聯雲閃付)

惠康 X 渣打
優惠期至:9月30日
優惠:
於惠康超級市場、Market Place by Jasons、Jasons  • Food & Living、ThreeSixty或Oliver's the Delicatessen分店單一簽賬滿$500即減$50;於惠康為您送或Market Place by Jasons網上品味超市單一簽賬滿$1,000即減$100。
額外獎賞比率:10%

華潤萬家 X 交通銀行
優惠期至:11月30日
優惠:
單一簽賬滿$500可獲額外5%現金回贈,每個信用卡賬戶回贈上限$200。
額外獎賞比率:5.4%
 

 

Apple Pay優惠

匯豐
優惠期至:11月30日
優惠:
單一簽賬淨額滿$200或以上,可獲額外$20「獎賞錢」,每人可獲額外獎賞上限$200「獎賞錢」。9月26日至10月31日期間於百佳超級市場、FUSION、TASTE、INTERNATIONAL、GOURMET、GREAT FOOD HALL及SU-PA-DE-PA 超市簽賬交易除外。
額外獎賞比率:10%

東亞 (須登記)
優惠期至:10月31日
優惠:
透過Apple Pay付款最少3次及成功登記,可獲25%現金回贈,限首30,000個合資格交易,每個賬戶可獲最多$180現金回贈。
額外獎賞比率:25%

中銀
優惠期至:9月30日
優惠:
首5次以中銀MasterCard/Visa信用卡透過Apple Pay作任何消費,可獲10X積分,每人最多可獲額外18,000分,限首 30,000 名客戶。
額外獎賞比率:4%

優惠期至:10月31日
優惠:
於華潤萬家單一消費滿$300即減$20,每人每日只可享優惠一次,商戶限10,000個合資格交易。
額外獎賞比率:6.67%

恒生 (須登記)
優惠期至:9月30日
優惠:
於指定商戶 (包括惠康) 累積簽賬每滿HKD500,可獲額外$50 Cash Dollars。單一簽賬$500或以上只當$500計算,每個信用卡戶口額外獎賞上限$150 Cash Dollars。
額外獎賞比率:10% 
 

 

簽賬金額要求
大部分超市同Apple Pay優惠都有簽賬金額最低要求,由$200至$1,000不等,所以唔好見到獎賞比率高就走去買,都要睇返自己買到幾多。而東亞同中銀嘅Apple Pay優惠到冇簽賬金額最低要求,適合小額交易。

額外獎賞上限
考慮完簽賬金額之後,就要睇埋額外獎賞上限。唔同獎賞嘅額外獎賞上限都有唔同,通常即時減價優惠都係逐次計,買幾多次減幾多次。送現金券優惠就限每人每日或每卡每日可以換1次,亦都唔限總共拎幾多次,直到換完為止。額外現金回贈或積分就會有上限。

其他優惠加持
有啲信用卡有超市類別優惠,例如匯豐「最紅自主獎賞」嘅「賞家居」6X「獎賞錢」、中銀i-card超市10X積分,夾埋超市或Apple Pay優惠一齊用,自然會賺得多啲。

獎賞目標為本
喺比較表入面,我將獎賞量化為金錢價值,方便比較。至於要用邊個優惠,就要睇返自己係想賺現金券、即時折扣、現金回贈、積分定係里數。如果想儲里數,可以用一啲積分可以換里數,或者直接儲里數嘅卡。再用埋儲積分或里數嘅優惠,例如匯豐簽$200有額外$20「獎賞錢」,可以換到200里數。

東亞、匯豐Apple Pay優惠較優
比較過以上超市同Apple Pay優惠,東亞Apple Pay優惠有25%回贈,亦冇最低簽賬金額要求,每個賬戶最多賺$180,即係可簽$720,同埋佢係以每個賬戶計,如果有幾張東亞卡,就可以逐張賺。然後匯豐Apple Pay,簽$200有額外$20「獎賞錢」,門欖都算低,不過佢同百佳現有優惠做到10月31號,應該11月開始會計返百佳用Apple Pay。

雖然銀聯同一田超市逢星期五優惠嘅獎賞比率都幾高,不過香港暫時得中銀GOOD DAY白金卡、工銀亞洲銀聯雙幣白金卡同AXA安盛白金卡有閃付功能,仲要就啱星期五去買嘢先有,唔夠彈性。

而其他獎賞比率過10%嘅優惠,例如匯豐 X 百佳、銀聯 X 百佳App、渣打 X 惠康,都要簽起碼$500先賺到,門欖比較高,可能要一次過買晒成個月嘅糧油雜貨先夠數。