驚到腳軟 祖琪帶你試玩 之 驚險遊戲體驗館
更新日期: 2016 年 03 月 29 日
心有不甘嘅我地一直搵呀搵，搵呀搵，憑住我地堅毅既精神，我地終於搵到一間叫做JetOne Motion嘅店鋪。
佢有三間分店，祖琪果日去咗銅鐵灣HMV嘅分店～
一去到已經見到有人玩緊，原來佢哋係用最新嘅4D科技，令你帶住副VR眼鏡進入佢個世界裡面。
一開始職員會先同我哋講解～教我哋要留意嘅野同埋點樣玩會真實啲。佢話如果你真實咁樣行路，你個感覺就會更加真實～不過我同琪都發現，係遊戲入面你要行得比真實大步佢先會感應到～
好啦，講咗咁耐，係時候玩啦～～唉，不嬲都人細膽細嘅我，為咗面子為咗男人嘅尊嚴為咗...（下刪一萬字）好！總之就係我玩先 :(
我地首先玩VR walker～哇，真係無誇張！我一帶咗副眼鏡好似進入咗嗰個世界咁。
裡面係一個廢置咗嘅工廠，個感覺勁似恐懼鬥室裡面嘅場景。一開始佢會指示你搭架Lift落去其他樓層，之後你就要自己探索，不停向前行。裡面有啲乜野我就留返比大家自己探索啦～
不過真係好想分享，我已經無帶耳機，但即使呀琪係我身邊係咁講嘢，我都係覺得好恐怖。因為當你帶住個4D眼鏡，你就好似自己進入咗果個世界裡面，係真係會驚到唔敢行前，好神奇～
另一方面，呀琪因為聽到“企係度都可以有離心力“嘅過山車雙眼發光，所以我地決定玩埋過山車！呢個過山車真係利害～職員哥哥同我哋講，佢平時試玩果陣都要坐喺度玩，因為企係度有時唔穩陣～呀琪一嚟就試企係度～佢玩咗十秒鐘就要扶住張枱，真係笑死我～而且，職員哥哥真係無誇大到，呢個過山車嘅奇妙之處，就係即使佢無一張會郁嘅櫈，但你坐同企係度依然會感受到佢嘅離心地～不過玩完真係有啲暈，所以大家要因應自己身體情況而玩呀，唔好勉強～
唔止過山車， 呢度仲有平時幾乎都有得玩賽車遊戲，不過喺得呢度玩，梗係唔同啲啦。揸起架車上嚟真係好有真實感，完全感覺到體感嘅樂趣，我玩到以為自己真係頭文字D嘅藤原托海。
總結呢個新科技真係幾得意，見到人哋玩嘅時候都會令你好奇有咩咁特別同好玩～我認為如果有興趣真係可以一試～特別係情侶拍拖呀，fd子聚會呀都可以來下呢度玩下。不過，價錢都係有啲貴，除非將來佢有優惠，唔係祖琪短期內都唔會玩lu ^_^
是次消費：
虛擬鬼屋＄180
過山車＄60
總數：＄240
地址:
銅鑼灣百德新街22-36號名珠城4樓
付款方式：
現金／信用卡
