香港買唔到iPhone 6 由外國入手
更新日期: 2014 年 09 月 18 日
雖然香港係首批發售iPhone 6嘅地區之一，不過因為炒風熾熱，不論是網上Apple Store預售，還是網上預約，都一機難求。如果手機合約未到期，亦唔會貿貿然續約、轉台或者新號碼出機。想要早買早享受，唔一定要用炒價買機，亦可以衝出香港，向世界出發，買外國版。
首輪發售除咗香港之外，仲有日本、新加坡、澳洲、美國、英國、德國、法國、加拿大，歐美地區個價錢兌返可能比香港貴。要買外國解鎖版，日本就係首選，第一梗係因為日圓低水，以iPhone 6 Plus 16GB計，未連稅￥79,800 (約$5,698)，連稅￥86,184 (約$6,154)，比香港 ($6,388) 平少少。至於新加坡同澳洲會比香港貴$600至$700，新加坡Online Store已經冇貨，澳洲就7至10個工作天或3至4個星期送貨 (視型號而定)，去Apple Retail Store排隊應該都可以買到。而日本版iPhone 6同香港版嘅Model一樣，如果係A1586 (iPhone 6) 或A1524 (6 Plus)，就可以支援香港同中國嘅4G LTE網絡，不過日本手機影相時即時開咗靜音模式，仍然會有快門聲，除非Jailbreak咗自己改。
雖然日本Apple Store變晒日文，但基本上同香港版一樣，睇漢字都大概睇得明嘅。
而家去日本Online Store買都係3至4個星期送貨，之前日本都要預約先可以去Apple Retail Store買機，不過而家好似可以Walk-in，如果近期會去日本，不妨去碰下運氣。有朋友喺日本讀書或Working Holiday，亦可以拜託佢哋幫你去門市買，或者去日本網上Apple Store訂，寄去朋友度再寄速遞或者搵集運寄返香港，不過要留意速遞或集運送唔送手機 (因為電池問題可能唔送)，訂之前記得問清楚。
去日本Apple網站睇下邊度有Apple Retail Store。