韓國爆滿水果杯 Cafe de Paris到港

韓風又襲港，完咗MAMA送走韓星之後，今次輪到韓國甜品。睇朋友ig、Facebook去韓國打卡都可能見過一杯滿到驚佢會冧嘅水果杯，出自以爆滿水果沙冰出名嘅Cafe de Paris。今次開舖都好有誠意，唔單止將所有系列都帶到香港，仲係用韓國運過嚟嘅材料，保證質素一樣。

好似搶包山咁高嘅水果杯其實係叫bon bon系列，包括士多啤梨、青提子、芒果同車厘子口味。唔同嘅水果都係來自不同地方，因為要確保水果一定要靚先用，即係尺寸要岩，同時要當造。為咗完美，老闆真係會細心睇過啲水果靚唔靚，所以每次入貨都有20%唔合格而唔用。水果杯嘅重點可能係水果，但我認為沙冰同忌廉呢兩個「幕後玩家」都唔好忽視。所有口味都有對應嘅沙冰，以韓國進口果醬調製而成，連忌廉都係韓國入貨。店員會喺收到order之後即刻整，將沙冰、忌廉同水果一層層咁慢慢砌，呢份心機都難得。