鋸扒嘆生蠔　觀塘「曼哈頓」西餐廳

朋友生日想食西餐，又唔想出到尖沙咀同灣仔咁遠，咁就提議不如去觀塘「曼哈頓」啦。想喺觀塘搵間靚少少，除咗APM同工廈之外其實都仲有選擇，今次就去咗亞太中心嘅Manhattan Grill & Bar。

餐廳環境分吧檯、室內同室外，本人因為一早book咗檯，當晚就揀咗坐室內嘅普通檯，位與位之間都算闊落同有空間，不過就幾應聱，有時傾計都要大聲少少，如果你坐個位近餐廳個open kitchen，有時都會有少少油煙味。至於間餐廳點解叫「曼哈頓」？事關牆上面有個曼哈頓夜景燈箱，都幾靚。

 

食物方面，呢度出名生蠔，差唔多每檯都會嗌，佢個menu有十幾款生蠔比你揀，因為本人平時唔多好生蠔，亦都唔識食，所以聽店員推介，嗌咗France Divine同Australia Coffin Bay。一分錢一分貨，貴啲嘅France Divine係好味啲，咸咸地易入口。

 

前菜嗌咗個大蝦、芒果、牛油果沙律（$108），兩個人食啱啱好。

 

之後就叫咗皇帝蝦意大利飯($168)，隻蝦係幾好味，不過個飯就咸得濟。

 

然後嗌咗個12安士美國穀飼牛Rib-eye($388)，我就覺得冇想像中咁好食，個邊有少少韌，不過食完真係超飽。

 

仲嗌咗兩杯嘢飲：Strawberry kiss同Green tea cooler，$48杯。

 

埋單$996，加埋一總共要$1063，記得記得，埋單之前比自己張AsiaMiles會員卡佢，呢間餐廳可以儲里數嘅，每2蚊儲1里，不過生蠔就唔計在內，所以最後儲到435里數，再用埋自己張信用卡找數，咁可以再額外儲積分。

餐廳資料：

Manhattan Grill & Bar

地址：觀塘觀塘道414號一亞太中心(OPC)3樓303號舖

電話：2345 8546 、2345 8547