【金枕頭 20蚊磅!】果欄 夏季 生果 攻略
【金枕頭 20蚊磅!】果欄 夏季 生果 攻略
相關信用卡:

【金枕頭 20蚊磅!】果欄 夏季 生果 攻略

發表日期: 2017 年 06 月 28 日 更新日期: 2017 年 06 月 28 日 飲食
作者:Salad Ho 沙律

夏天大量生果當造,除咗可以解暑降火,仲可以紓緩皮膚長時間於冷氣房長時間下乾燥嘅情況。想買抵食生果當然要去果欄慢慢揀,依家嚴選5種抵食時令生果,個人推介即叫即開嘅金枕頭榴槤,抵食又新鮮,唔怪得門口長期排長龍啦。

 

5大抵買生果

1.金枕頭榴槤
 


果欄價:$20/磅

特點:榴槤迷最愛榴槤品種,味道濃郁,而且甜度高!果肉厚實,咬落質感似牛油,軟滑綿密。果欄呢檔放置一座「金枕頭山」,榴槤飄香,老闆即叫即開殻、起肉,保證新鮮,難怪一直人龍不絕,街坊最少都買幾磅返屋企嘆。
 

 

2.西班牙車厘子

特點:夏天當造水果之一,西班牙車厘子,粒粒大粒飽滿,體積有5蚊銀咁大粒。果肉夠硬,食起嚟汁多而且味甜。車厘子有補血功用,適合貧血或面色差嘅女士,不過由於車厘子多鐵質,如果每日食多過15粒,有機會令人輕微氰化物中毒,所以少食多滋味啊。

果欄價:$35/磅

 

3.牛油果

特點:呢檔嘅牛油果呈深綠色,外面滑身冇凹凸,屬於靚牛油果。不過果肉仍硬身,即係仲未熟,買返屋企等多一星期就可以食喇。不過牛油果含油量較高,唔建議進食過量,最理由係一日食1/4個牛油果,一周最多可以食4次。

 

果欄價:$50/6個;$8.3/個

 

4.玫瓏黃金瓜

 

日本玫瓏哈蜜瓜非常出名,不過價錢好貴唔係人人都食得起,冇budget嘅朋友或者可以試試玫瓏黃金瓜,同樣都係蜜瓜品種,雖然甜度冇玫瓏哈蜜瓜咁高,不過都甘甜多汁,而且有豐富嘅維他命C,而且低熱量,女士們可以食多啲。

果欄價:$30/個

 

5.越南西瓜

想食生果消暑一定會諗起西瓜。呢款越南西瓜體積細細,適合一人獨食,唔怕買太多食唔切變壞。特點係皮薄、多汁香甜,非常消暑。揀咗幾個都發現西瓜頭椗呈啡色,代表已經成熟,買返屋企可以即食喇。

果欄價:$25/個