里數最佳化 點用先最抵？

相信呢度有唔少信用卡新手，申請用張卡就當然碌下佢啦
但碌碌埋埋最後咁多里數，到底點樣可以好好利用佢哋賺到最盡呢？

換旺季機票
好快就暑假啦，代表一大班中、小學生放假啦，而佢地班中產父母自然又會帶佢地去旅行啦。反正就係代表咩嘢都加價，嗰啲熱門地點機票全部都加哂價。
呢個時候就係用Miles好時機啦，因為大家可以長達成一年預留定旺季機票，只要做好計劃，早啲用miles留定機位，咁到時就算旺季機票加得幾多都好，咁都唔關你事啦。而且旺季用Asia Miles就更加令到每一里嘅價值比淡季多，實質上更加著數。

豪坐商務客位
如果大家覺得商務客位嘅價錢太貴。以國泰由香港去倫敦計，經濟要一萬，特選經濟要萬六，商務六萬，頭等九萬五。

但假如用里數換，經濟要六萬里，特選經濟要七萬二，商務十二萬，頭等十八萬。即係話只要你比兩倍econ嘅里數就有business坐。但如果用錢買機票就要比多成6倍先坐到商務。所以Asia Miles用嚟換商務客服係超值的。

個人反而唔建議換經濟或者特選經濟，首先經濟客位好多時候都會做減價，但就算經濟位減價，航空公司都唔多減商務票價，反正佢地認為比得起錢坐商務都唔理果小小錢啦。
另外特選經濟真係最無聊嘅產物，又經濟，又特選，定位夾係中間，兩頭唔到岸。只係可以講啲位叫大少少，不過都係冇得好似商務位成個人訓囉，Lounge又冇得用，嘢食又唔係特別好，真心最抵玩一定係坐business，淨係講嗰張可以變做床嘅椅呀，係嗰十幾個鐘機都已經咩都值啦！而且人一世物一世嘛，依家仲要唔使錢，大家記得飲住香檳邊影相post上Facebook、Instagram，保證你會成為焦點，呢個賣點又值好幾千里了！

咁多里幾時先儲完？
雖然用里數換機票係平好多，但係里數係靠平日消費先得到嘅，咁到底要消費幾多先換到歐洲機票呢？
以econ class為例，要60,000里數，如果唔計任何信用卡特別優惠，以我最鍾意嘅BEA Flyer World Master為例，平日簽卡可以$5/里，而且最正係唔使俾錢換Asia Miles，你知啦，好多卡都收你幾百蚊先肯將積分換做Aisa Miles，感覺上真係唔多抵囉。
但係即使$5/里，各位都要簽$300,000先可以換到6萬里，一個月當大家簽$20,000，簽一年零三個月先得。如果想換頭等就更加要簽成兩年半先得。
而且我相信各位都應該想同朋友或者愛人一齊去旅行吧，變相想去到超豪蜜月旅行要用成5年先得呢。

俾錢買里數 即刻起飛
正所謂積小成多，當大家儲儲下其實就好快儲到好多里數，跟住最新嘅信用卡優惠，一個餐飲10X積分已經令大家快十倍速度儲里數，完全唔可以忽略呢啲優惠。
好啦，真係唔夠里數咁點呢？各位新手們，唯有買里數，例如去網上嘅「交易區」。冇錯，里數都可以買賣架，以Asia Miles 為例，每里大約賣$0.15，就算當大家真係一個里數都冇，買夠12萬坐商務里數都只係$18,000，冇錯，$18,000坐商務去倫敦，真係平到爆！

如果大家唔想係Forum買賣，嫌太麻煩，都可以直接喺Asia Miles官網買，佢地依個買Aisa Miles嘅服務叫做「達成里賞」，每2,000里賣$60 USD，不過就要你本身有個程機嘅7成里數先得，即係完全零里數嘅新手就用唔到呢招了。仲有呀，官網好聰明，你買完里數後個戶口結餘唔可以多過2,000里，即係想買多啲留返下次用都唔得，而且用$480港紙買2,000里，變相$0.24 一里，比起「交易區」貴咗啲啲。不過就啱晒差少少里數又趕住換機票嘅人，反正買嘅里數唔多，價錢唔會話差太大。


最後呢，我有個比喻，其實里數就同現金一樣，有現金就咩都買得到，只不過係唔同店鋪買同一樣嘢會有唔同價錢，呢個時候大家就要諗下點樣用手頭上嘅里數嚟換取最大價值嘅機票！只要好好運用里數，將每一里嘅價值都發揮，甚至用嚟做買賣，更快達到起飛目標，又可以減少為咗儲理數而進行不必要嘅消費，咁先係明智呢！