出卡賺迎新係賺里數、回贈比較快嘅方法，2017年有唔少卡都有新嘅迎新優惠，又係時候同大家介紹返。上次講完2017必備信用卡，如果大家未有嗰啲卡，又有興趣出返一張傍下身，，就要繼續睇呢篇Blog，因為我會講埋上次揀咗出嚟嗰幾張嘅迎新優惠。
迎新優惠只限全新客戶
一般嚟講，信用卡迎新優惠只係「全新客戶」先有。點先為之「全新客戶」呢？就係之前冇嗰間銀行嘅信用卡，或者之前有但之後取消晒，一張都冇，喺再申請之前嘅已經隔咗一段指定時間(通常係一年，視乎個別銀行或迎新優惠而定)，都算係「全新客戶」。有啲迎新優惠講明現有客戶都有份，但獎賞通常都唔及全新客戶咁多。
中途取消須收手續費
好多人諗住出咗新卡賺完迎新就Cut卡，不過未滿指定期限 (通常又係一年，視乎個別銀行或迎新優惠而定)，中途取消可能要收返手續費，另外再收返同迎新禮物 (現金回贈 / 現金券 / 實物) 價值一樣嘅費用；如果係額外積分或里數，亦會按比例計返手續費。
所以有人會出張卡賺完迎新，等到過咗指定保留期限先會Cut卡，等過咗一段時間 (過冷河) 之後，等到有吸引嘅迎新再申請再賺過。
迎新優惠一覽
雖然有唔少現身優惠都係由1月1號開始，不過迎新禮品都係熟口熟面，其實可以當延期。我都整咗個表，方便大家參考。
里數之選－渣打亞洲萬里通萬事達卡
有幾張卡都可以做到$1以下賺1 Asia Miles里數，當中以渣打亞洲萬里通萬事達卡嘅$0.5一里最抵，簽頭$7,500可以賺到15,000里數。之後就$2=1里數，可以簽$30,000，同樣賺15,000里數，拉勻係$1.25=1里數。
另外，雖然Citi PremierMiles信用卡以比率計唔係最抵，但佢可以換Avios，迎新賺18,000Avios可以換到2張台北來回機票。
回贈之選－富邦白金卡 / Titanium卡
佢嘅迎新係送積分，迎新連埋網上申請有60,000分，可以選擇換里數或現金回贈，換里數都可以做到$0.67=1里數。如果換現金回贈，用20,000就換到$100，比一般要25,000分平一截，不過3月1號係會變成22,000分換$100，都仲有超過10%回贈，單純以迎新計，比率都算高嘅。
中銀i-card簽$2,000就有4張UA電影禮券，價值$340，以價值比率計亦唔錯。
選擇最多－Citi PremierMiles信用卡 / Citi Rewards信用卡
除咗現金回贈同里數，Citibank嘅迎新禮品仲有唔少選擇，例如唔同商戶現金券、Dyson無線吸塵機、Uber免費乘搭等，連足球手機遊戲虛擬角色同道具都有得揀，都算跟住潮流走。