邊間出機抵？iPhone 7 / 7 Plus 上台Plan比較

iPhone 7 / 7 Plus出咗，有幾多人想換機？除咗直接買機，各大電訊商都有上台Plan，如果咁啱要續約，或者想轉台，可以參考下呢篇比較唔同台上台Plan價錢嘅格價文。

csl. / 1O1O送The Club積分換里數

如果係出10GB Plan夾32GB或128GB嘅iPhone 7 / 7 Plus，就會有10,000 Club積分，可以換到10,000 Asia Miles里數。另外每個月交月費，每$10可以賺1 Club積分。

1O1O客戶Join任何Plan都會有額外Club積分，由1,500至2,500不等。揀10GB Plan唔要10,000 Club積分，亦可以揀新濠影滙酒店「明星滙」2日1夜酒店住宿 (價值$2,480)。

另外Join 2.5GB或以上Plan，會送樂視體育Now英超1台，可以用手機睇2016/17英超球季比賽。

SmarTone免費保爆Mon

個人認為SmarTone最有用嘅優惠，就係頭12個月保你因而外而爆Mon要換，佢會畀返錢你，亦可以用$300延長至24個月，或$400 24個月內保2次爆Mon。對於粗手粗腳或粗用電話嘅用戶嚟講，都幾啱用。

除咗上台，SmarTone仲有SIM Only淨機即減$500優惠，呢個其實即係以前畀$500訂機，只係揀指定Plan，機價就減$500。至於幾時有機喇喎...

3HK用匯豐卡送額外數據或回贈

由即日起至 2016 年 10月 31 日，用滙豐信用卡揀6GB或以上上台出機Plan畀晒全數，每月有額外2GB數據用量，或者$400月費回贈；6GB以下就有每月額外1GB或$200月費回贈。如果係帶號碼轉台，再送每月2GB數據。

中移動中港澳台數據共用

除咗本地Plan，中國移動香港仲有『飛常大中華』4G買機上台服務計劃，數據用量可以香港、中國、澳門同台灣一齊Share，經常要去呢啲地方出Trip或旅行嘅人可以考慮。

中聯通亞太七地數據共用

中國聯通 (香港) 除咗有本地Plan、香港同中國共用數據嘅中港Plan，仲有大中華Plan，一樣係香港、中國、澳門同台灣共用數據用量，喺日本、新加坡、澳洲都可以，每個地區每月要畀多$38，不過唔用係唔收費嘅，去旅行就唔使買上網卡啦。

本地Plan－中聯通、中移動較平

一睇價錢，中國聯通 (香港) 係最平，不過要留意，中國聯通 (香港) 中階Plan只有2GB同5GB數據，其他都有2.5GB同6GB，所以平啲都係應該的吧。以同等數據用量嚟睇，就係中國移動香港平。當然，呢度只係從價錢方面分析，至於邊個台接收好，邊個台成日斷線，呢個就留返俾大家同親戚朋友做下Research喇。