遊日本 平價Wi-Fi上網方案
遊日本 平價Wi-Fi上網方案
相關信用卡:

遊日本 平價Wi-Fi上網方案

發表日期: 2014 年 08 月 14 日 更新日期: 2014 年 08 月 14 日 旅遊
作者:積克

而家出去旅行好興租俗稱Wi-Fi蛋嘅Pocket Wi-Fi Router,貪佢一個日費基本上隨時隨地任用,而且仲可以多人多機Share,夠晒方便。不過租蛋逐日計錢其實都幾襟計,以日本為例,通常都要$60至$90一日,而且蛋就得一隻,要上網就要黐實帶蛋嗰個,如果分頭活動的話,其中一邊就冇得上網,有利有弊。


當然啦,如果你有重度上網成癮症,上少一陣網都周身唔自在,咁真係要租蛋頂癮。如果你係得閒先上一上,行到攰去Cafe飲杯嘢攤抖時先順便Upload下相上Facebook,咁用當地Wi-Fi就足夠。日本Wire and Wireless有提供「Wi2 300」Wi-Fi服務,覆蓋全日本主要城市,喺快餐店、咖啡室、便利店、公共設施、機場等都有Wi-Fi熱點,需要上網時仲有一個喺左近。佢有幾種方案,有6小時 (¥350)、一日 (¥800)、三日 (¥1,500)同一星期 (¥2,000),可以就返自己旅程長短。

LAWSON都有Wi2「Wi2 300」熱點。

而家VISA卡主可以申請佢個1日免費方案,用完再申請三日或一星期方案仲有8折,即係¥1,200 (約$90) 同¥1,600 (約$120) ,再加埋頭一日嘅免費方案,平平地諗得過。出發前申請定1日免費方案,到埗後用完免費方案上網再申請呢兩個其中一個收費方案就OK。呢個優惠做到8月29號,1日免費方案使用期限就係9月30號前,至於詳細申請步驟可以去優惠網頁睇返。