《葉問3》一戰5000萬？！

《葉問3》上畫第3星期，累計已經去到4500幾萬，絕對會成為2015年港產片票房冠軍，打低咗舊年風頭超勁嘅《五個小孩的校長》，咁嘅勢頭，去到5000萬都唔係話無機！雖然《葉問》成績不嬲唔錯，但勁到咁嘅成績係令人有啲意外，睇嚟拍《葉問4》都不遠矣喇！而從08年第一套《葉問》上畫大受歡迎之後，呢幾年用葉問做題材嘅電影，拍完又拍，拍完又拍，不禁令人講句，俾老人家「葉問」個名休息下啦。

話雖如此，但的確由葉偉信、王家衛、邱禮濤三人鏡頭下所呈現的葉問，都係截然不同的，王導著重美感、每個鏡頭唯美程度是你隨便pause都可以用嚟做桌面Background；邱導執導、秋生演的葉問多出一份老練與氣派，加埋獨有的秋生式口音，最有「老師父」風範，而且最貼近史實；而甄子丹的呢？作為觀眾我對「葉問」的印象可說是停留他身上的，但相信大家睇丹爺，都係最鍾意睇佢打到飛起啫。

所以劇情講咩，小妹都知道唔太重要，正正常常就ok，最緊要都係同邊個打，同埋點樣打啦。講返《葉問》1＆2，還覺得劇本不過不失，必然有商業式的煽情俗套，但總算交出令人記得的高潮位，也是計算精準。《葉問1》令人印象深刻的必然是個哨牙日本仔連拎米嘅窮人都唔放過，叫人打完一輪後竟然無啦啦一槍射爆人個頭，看到人咬牙切齒，激到丹爺出手，「我要打10個！」；而《葉問2》的則是平日看似霸道的洪金寶，在台上對戰洋鬼子戰死，還熱血地用最後一口氣說：「為生活，我可以忍；但侮辱中國武術，就唔得！」

但今集小妹就覺得遜色喇，如果說以上的反派太cliché太行，起碼都有個flow跟，但今集故事散亂薄弱，如果唔係打呀打呀打，真係令人難以投入。其實明嘅，今集無一個「典型嘅大反派」出現，係因為想將重點放係葉問將死嘅妻子，張永成（熊黛林飾）身上，舖出最後一句：「其實最緊要嘅，都係身邊嘅人。」


但小妹就覺得眼高手低咗啲。搞到熱血又唔熱血，但感動又唔係好感動喎，將以往觀看《葉問》會被燃起的激憤一掃而空，而同時無俾到新嘅滿足俾到觀眾，簡單啲嚟講是在食老本。不過對打方面還是不過不失的，沒有太大驚喜，但亦未算揸流攤，不過如果細心留意，都有幾多鏡頭唔接，而且偶有主角打完一個動作但啲茄哩啡未撲上嚟嘅尷尬位；well但放鬆啲睇係無事嘅。

小妹睇完真係有啲心酸，唔係因為葉問老婆最尾死咗，而係想起其實這套算為「港產片嗎」？不禁輕嘆一口氣。當然，電影本來就是一盤生意，是應該看開點的！學葉問話齋：都係搵啖飯食啫。

最後一提，用建行(亞洲)卡去AMC戲院、百老匯院線、MCL院線睇戲，正價戲飛都有9折，聽完小妹講完想翻睇都抵啲。