荃灣愉景新城旺中帶靜 奀星之選
荃灣愉景新城旺中帶靜 奀星之選
相關信用卡:

荃灣愉景新城旺中帶靜 奀星之選

發表日期: 2016 年 12 月 08 日 更新日期: 2016 年 12 月 08 日 生活
作者:August Amber

無綫藝員李潤庭因為做《東張西望》主持而成功入屋,但佢趁空姐老婆離開香港,竟然明目張膽帶小三返愉景新城屋企。佢同小三搭地鐵返歸期間,雖然東張西望,但仍然被狗仔隊全程影實,最後前後腳經愉景新城嘅商場返屋企,畀人斷正。睇嚟李潤庭今次偷食形象都要入屋了,而愉景新城就受到另類嘅注視。

 

▼愉景新城10月平均實用呎價係$11,398

 

呎價$11,000

查實李潤庭同佢嘅正印空姐老婆喺愉景新城築愛巢,係個唔錯嘅選擇,事關愉景新城遠離荃灣港鐵站,周圍唔算人多,旺中帶靜,唔會一落街就吓吓畀街坊認到,幾啱奀星住。李潤庭帶小三返屋企,其實唔係搭地鐵咁張揚,而係搭的士嘅話,就算畀傳媒影到,佢都仲有得解畫。

 

▼愉景新城商場夠大,但有時幾靜吓,啱奀星住,唔會成日畀人眼睥睥。

 

愉景新城喺1997至1998年入伙,共12座,單位有3,300幾個,上個月即加辣前嘅交易量有13個,不過不失啦,但勝在喺依家樓價咁高嘅情況下,實用呎價都只係$11,000鬆啲,租住嘅實用呎價都係$24至$28,對一啲搵唔多,唔想一落街就畀人捉住影selfie嘅藝人嚟講,算係一個唔錯嘅選擇,當然,鍾意住得旺中帶靜嘅,都可以考慮吓。

 

8成按揭 月供$14,000

11月初加辣後,愉景新城成個月有約8宗成交,實用呎價都係$11,000多少少至$12,000鬆啲,走趨穩定。我哋喺美聯上網搵樓,見到最低售價嘅單位要$478萬嘅4座高層B室,實用呎價$10,000,實用面積474方呎,不妨以呢個例子,睇吓最平幾錢先可以入手愉景新城。

 

 

以依家呢個時勢,$400幾萬嘅樓唔算貴。由於單位售價超過$450萬,所以最多只可以做到8成按揭,但同時要做埋按揭保險費。如果要入手4座高層B室呢個單位,首期接近要$100萬,計埋其他雜項,入場費要成$118萬左右;以供30年期計算,每個月供$14,400,仲要畀埋按揭保險費等等,首次置業人士自住呢個單位,每個月都要成$16,400蚊,搵成$35,000一個月先過到壓力測試,真係搵少啲都唔得。想供少啲,畀多啲首期咩?過百萬嘅首期又唔易儲。

 

鑽石廳設計 布置需花心思

當然啦,樓唔係個個買得起,做師奶電視節目主持都唔一定能夠儲夠錢買樓。依家愉景新城都有唔少租盤,實用呎租$24至$28不等,實用面積400幾方呎嘅單位月租$14,000起跳;600方呎以上就$20,000起跳。

不過要注意嘅係,愉景新城嘅單位都係鑽石廳設計,家具布置上要花點心思。

 

▼愉景新城有巴士站總站,但路線唔多

 

▼同荃灣站有約十分鐘嘅步行距離,所以交通未算好方便

 

李潤庭偷食畀傳媒斷正,帶小三返自己同老婆嘅屋企,雖然唔肯定喺裏面做過乜,但筆者覺得,有能力嘅男人,除咗畀正印一個家,都要搵個地方畀小三踎,否則冇咁大個頭,就唔好戴咁大頂帽,咁好cheap囉。當然,唔專一嘅男人其實已經夠cheap,大家千祈唔好學!