職場新人 儲里數信用卡之選
職場新人 儲里數信用卡之選
相關信用卡:

職場新人 儲里數信用卡之選

發表日期: 2016 年 06 月 10 日 更新日期: 2016 年 06 月 10 日 Asia Miles 信用卡Avios 信用卡生活
作者:積克

就嚟又放暑假,每年到咗呢個時候,亦代表一批大學生畢業,投身職場。出嚟做嘢,有經濟能力,想申請返張信用卡傍下身,順便儲下里數。不過剛剛做嘢,人工唔高,未必申請到入息要求比較高嘅卡。咁係咪代表好難儲到里數呢?又唔一定,仲有一啲比較親民嘅卡可以考慮。

年薪$150,000之選

積分永久有效-Citibank Rewards Card
通常信用卡積分都有有效期,長短不一,Citibank Rewards Card就永久有效,唔怕未儲夠分換里數就過期,比較適合想學儲里數嘅新手。同埋佢超市、百貨公司、電訊商有5X積分,$3=1里數,日常消費好易儲到。除咗Asia Miles,佢仲可以換英航Executive Club Avios,飛短途抵換。另外Rewards銀聯卡可以免費入香港機場環亞機場貴賓室 (銀聯鑽石卡優惠),去旅行啱用。

網購、非接觸式交易-中銀i-card / 建行(亞洲)eye信用卡
中銀i-card同建行(亞洲)eye信用卡喺網購同非接觸式交易 (MasterCard Contactless / payWave) 都有額外積分。表面上中銀i-card 10X好似好好多,係,的確係,如果每個月只簽$1,111以下的話,因為中銀10X嘅額外積分每個月上限10,000分,非接觸式交易仲要同指定類別商戶同一個上限,所以都幾易爆Quota;而建行(亞洲)eye信用卡5X嘅額外積分上限每年300,000分,每個月可以簽到$6,250,所以大家可以因應自己每月使費選擇用邊張。

優惠多多-匯豐白金Visa卡
匯豐算係比較多信用卡優惠嘅銀行,特別係「最紅自主獎賞」,6個消費類別最高有6X「獎賞錢」,除咗將倍數編去超市、百貨公司,好多人亦都編去食肆做食飯卡,6X有$4.17=1里數,都算唔錯。白金Visa卡入息要求原本要年薪$250,000,今年先改為$150,000,雖然入息要求降低咗,不過滙豐批卡比較嚴,未必一申請就批。

抵玩短途-大新英國航空白金卡
除咗Asia Miles,仲有其他飛行常客計劃嘅,以短途計,英航Executive Club其實都係一個唔錯嘅選擇,因為佢都可以換到國泰航班,換台北回來機票只需9,000Avios,少過Asia Miles 15,000里數;換東京來回機票20,000Avios,都少過Asia Miles 30,000里數。不過香港可以儲Avios嘅卡唔多,大新英國航空白金卡就係直接儲蓄Avios,本地$6=1 Avios、海外$4=1 Avios,同某啲儲Asia Miles嘅卡一樣。

年薪$100,000以下之選

台、日、韓勁賺-富邦Titanium萬事達卡
富邦白金卡 / Titanium萬事達卡海外簽賬出名好賺,海外簽賬4X積分,尤其是台灣有20X積分 (額外16X積分每月最高80,000分,每年最高160,000分,即係每月可簽$5,000),日本同韓國都有8X積分 (額外4X積分每月最高80,000分,即係每月可簽$20,000),台、日、韓都係香港人熱門旅遊地點,去旅行好易簽夠。不過佢積分有效期只有1年,要密啲換里數,成本 (手續費支出) 會多啲。

同級優惠-Citi Rewards Titanium萬事達卡 / 匯豐匯財金卡
呢兩張卡入息要求比白金卡低,但係優惠差不多一樣,Citi Rewards Titanium萬事達卡都有指定類別5X積分、生日8X積分;匯豐匯財金卡都可以登記「最紅自主獎賞」,照賺6X「獎賞錢」。

容易申請-AEON JAL萬事達卡
AEON嘅信用卡一般都比較容易申請,不過佢要簽$8先有1里數,要儲耐啲先換到機票。

迎新送里數
以上嘅卡唔少都有迎新禮物,當中送里數嘅多數都唔使$1就有1里數,例如美國運通國泰航空信用卡頭3個月簽$3,000就有3,000里數,加埋網上成功申請額外送$2,500里數,加埋就有5,500里數,大約$0.55=1里數,如果搵到朋友推薦申請,再送1,500里數,都幾易賺。

匯豐白金Visa卡$1.15=1里數,其實都算唔錯,當中payWave交易5次,每次$50以上就有$100「獎賞錢」,即係$0.25=1里數,如果簽唔夠$6,000,淨係賺呢個都OK。但要留意,匯豐匯財金卡係冇payWave功能,所以冇額外$100「獎賞錢」迎新優惠。
 

幾時申請好?
唔同銀行有唔同要求,有啲係要要求有3個月入息證明,所以返咗工3個月之後申請就比較好。同埋如果你想申請嗰張卡,剛好同出糧戶口係同一間銀行,申請成功機會亦會大啲。

換里數要畀手續費
除咗有啲直接簽賬變里數嘅卡,大部分積分換里數都要畀手續費,每次由$50至$500不等,至於要畀幾多,可以參考呢篇Blog