聖誕自助餐推介（九龍新界篇）
更新日期: 2016 年 12 月 18 日
上次筆者介紹完港島區精選聖誕酒店自助餐廳，依家當然要介紹埋九龍同新界嘅酒店自助餐啦。由於新界及九龍因為佢哋嘅等級同位置不如港島般集中同較單一，酒店自助餐價錢嘅差異大，如果識揀，每位隨時慳$300，一家四口去食就慳$1,200左右。當然，聖誕節最緊要食物開心，大家不妨參考吓下面嘅資料，選擇今個聖誕喺邊食自助餐。不過要提提大家，聖誕旺季，要食，就盡快扑鎚訂枱喇。
龍堡國際：園林閣咖啡室
園林閣咖啡閣室嘅自助餐價錢不嬲較平，食物種類唔少，但食物質素係點，筆者就唔多講喇，不過一到聖誕節，佢哋就緊係會增加應節食物啦，而且平安夜同聖誕節呢啲旺期，價錢比其他酒店隨時平一截，平$200至$300，性價比高，係一個唔錯嘅選擇。
今個聖誕，園林閣咖啡室主打冰鎮海鮮，美國生蠔、雪花蟹腳、青口同凍蝦呢啲當然唔少得，佢哋仲有聖誕特別推出嘅紐澳良烤火雞同龍蝦芝士火鍋、香芒帶子，唔單止，佢哋仲有花膠鴨掌煲同蝦籽素雞炒海參呢啲中式嘢，就算帶食唔慣西餐同生冰嘢嘅老人家嚟，都唔驚唔啱食。
▼豐富海鮮
▼露斯瑪利燒羊架
▼紐奧良火雞
喜來登酒店：咖啡廳
喜來登酒店就唔同啲，除咗佢哋個咖啡廳有自助餐食之外，視佳廊同蠔酒吧都有搞平安夜、聖誕日同除夕晚餐，仲可以一覽維港景緻，但就唔係自助餐，為怕離題，在此就不作介紹。
講返咖啡廳個聖誕自助晚餐，咖啡廳個聖誕自助晚餐有即開美國及法國生蠔、波士頓龍蝦、美國青口、鱈場蟹腳、大蜆、虎蝦，熱食方面則有鮑魚花膠燉烏雞、即切香草燒羊架、香烤戰斧牛肋骨、香煎鵝肝﹑烤龍蝦及香煎珍寶帶子等，全部都美味非常，價錢貴得有道理。要提提大家嘅係，佢哋6點至8點個自助餐booking已經full咗，扑鎚訂位，記住要快！
▼冰鎮海鮮盤：波士頓龍蝦同鱈場蟹腳
▼精緻甜品
郎廷酒店：The Food Gallery
The Food Gallery今個聖誕喺布置上大打胡桃夾子主題，餐廳滿布胡桃夾子士兵，又靚又可愛。嘢食方面，佢哋有聖誕唔少得嘅烤火雞，仲有新鮮生蠔、阿拉斯加蟹腳、精選亞洲鐵板燒美食如釀魷魚、韓式煮牛排、泰式椰汁紅咖喱等。此外，今個12月仲有可以可無限量享用多款口味Haagen-Daz雪糕及巧克力噴泉，用嚟點水果、棉花糖同泡芙等等，甜到入心。
▼生蠔
海逸酒店：Promenade Restaurant
一講起Promenade Restaurant，大家一定諗起佢個足足有70米長嘅自助餐桌，同超大空間兼樓底極高嘅餐廳大堂，剩係齋坐喺度，感受吓食客愉快嘅氣氛，都值回部分票價。
佢哋聖誕檔期自助餐主打意大利美食，包括有意式薄切黑松露三文魚刺身、意大利熟火雞胸肉、意式小龍蝦燴飯、意式炸海鮮等等，仲有意大利紫薯雲吞、威尼斯面具曲奇餅等等，畀你喺香港食住感受意大利味道嘅聖誕大餐。
佢哋仲會喺現場安排現場樂隊及聖詩班表演，仲有聖誕老人撐場添，小朋友仲有機會得到聖誕禮物一份！
▼Promenade Restaurant環境舒適
帝京酒店：花月庭
輪到MK嘅代表花月庭，雖然花月庭位處MK（準確嚟講係旺角東），但唔代表佢哋啲嘢食粗製濫造。花月庭喺聖誕就大搞新意思，大打「魅幻星河聖誕盛筵」。大家唔好誤會係食太空人餐，而係食物嘅賣相會有「星河」造型。
當中「星河」味道最濃嘅係佢哋嘅甜品，仲聲稱一系列「星河」造型甜品「帶您乘坐火箭登陸銀河星際上，讓您探索味覺星河之旅 」。另外仲有無限量供應Movenpick雪糕、聖誕雜莓蛋糕、焦糖泡芙聖誕樹、聖誕免治批、聖誕布甸配白蘭地汁、紅桑子芝士慕絲蛋糕、香草栗子慕絲蛋糕及雪糕朱古力噴泉等。
▼烤玫瑰煙燻原隻火雞
▼聖誕菓子蛋糕
皇冠假日酒店：尚廚
講完九龍區嘅代表，輪到新界區代表上場。將軍澳皇冠假日酒店嘅尚廚聖誕自助餐，價錢雖然比九龍商業購物區嘅酒店平$2、300，但食物都係常見嘅冰鎮海鮮盤、長腳蟹等。佢哋都有龍蝦，但只係每位奉送即煎開邊龍蝦半隻；另外仲有淡水小龍蝦，不過大家有睇新聞都知，食小龍蝦可能對身體有害。
佢哋都有聖誕火雞同大量甜品，仲有煎法國鵝肝配雜莓醬、香草黑松露海鹽慢焗澳洲和牛等，不過不失啦。大家要注意嘅係，佢哋要求訂枱前4日要先全數付款。
黃金海岸酒店：聆渢咖啡廳
講完新界東，咁緊係要介紹返個新界西啦，黃金海岸酒店嘅聆渢咖啡廳喺今個聖誕就搞搞新意思，搵嚟卡通人物Peppa Pig玩crossover，塑造「Peppa Pig聖誕童夢園」主題自助餐，Peppa Pig嘅圖案將會出現喺蛋糕、法式蛋白杏仁餅等甜品上，非常可愛有趣。
聆渢咖啡廳同其他酒店自助餐喺食物上最大嘅分別，係佢哋由24號至26號嘅自助餐，將會供應瑞士烤芝士，師傅會把以牛乳製成的芝士烤至半熔，然後把金黃色外脆內滑的芝士放到新薯、小洋蔥和小酸青瓜上，炮製暖胃菜式。
▼peppa pig造形甜品
▼瑞士烤芝士放新薯小洋蔥同小酸瓜
