玩得安心 旅遊保險選購9個須知
玩得安心 旅遊保險選購9個須知
相關信用卡:

玩得安心 旅遊保險選購9個須知

發表日期: 2017 年 04 月 15 日 更新日期: 2017 年 04 月 15 日 旅遊旅遊保險
作者:積克

去旅行買旅遊保險求個安心,萬一唔好彩發生意外都有個保障。不過旅遊保險嘅受保範圍,賠償都有唔同,要點樣先可以揀到啱自己嘅,就要留意以下重點。

 

留意受保範圍
每個保險計劃嘅受保範圍都有出入,主要包括以下呢啲:
-人身意外(死亡、失明、殘廢)
-醫療費用(覆診費用、住院津貼、緊急醫療撤離、子女送返)
-個人財物及行李遺失或損毀
-個人現金遺失 (或包括信用卡)
-遺失旅遊證件
-旅程或行李延誤 (因行程延誤導致額外住宿或交通費)
-個人責任 (導致他人受傷或財物損失之賠償)
-行程取消或提早結束
-旅遊期間家居財物被爆竊

不受保障項目
主要唔包嘅項目有:
-受保前已存在之疾病或損傷
-戰爭
-生物、化學或核子恐怖襲擊
-違法行為
-職業或收受酬金之運動或競賽
-懷孕、分娩、流產、墮胎
-自殺、自我傷害
-愛滋病、性病
-酗酒、濫用藥物

 

留意保障細節
除咗受保範圍,重要留意下保障細節,特別係較常出現嘅情況,例如航班延誤、行李損壞、遺失手機或財物嘅條款,睇清楚航班延遲幾耐先會賠、行李損壞或遺失手機嘅賠償金額等。

最常出現嘅行程延誤,可以索償嘅時數同金額會有分別。

 

高危運動有限制
以前旅遊保險通常都唔包高危運動,不過呢類活動愈來愈普遍,所以保險公司都加入相應保障。不過呢類保障只限業餘性質,同埋會有限制,例如潛水深度、攀山高度。

 

海外馬拉松要注意
而家愈來愈多人參加海外嘅馬拉松比賽,旅遊保險又包唔包呢?其實又要睇條款,有啲列明唔包括競賽活動;有啲就寫「職業運動員」、「有報酬下進行比賽」,業餘參賽者去挑戰自己,比完賽又冇錢收,應該都係受保範圍。當然,到底包唔包,都係要以保險公司為準,如果條款有唔清晰嘅地方,記得問咗先買。

睇返旅遊保險嘅條款,第5同第6條,業餘跑手參加馬拉松應該係屬於受保範圍。

 

自駕遊墊底費
通常自駕遊租車都會有埋保險,通常都有一個補償金額,例如撞咗車要整車,過咗呢個數就要自己負責,或者有一個「墊底費」。雖然旅遊保險嘅意外賠償通常只包公共交通工具,唔包自駕遊,不過而家唔少都會加入「租車自負額」,可以賠返墊底費嗰部分;而個人責任保障就包導致他人意外受傷或財物損失嘅賠償。

 

郵輪假期保障或有不足
而家興郵輪假期,不過一般旅遊保險條款喺普通旅行同郵輪假期嘅解釋可能有分別,保障亦未必全面,例如緊急醫療、要用衛星電話聯絡香港家人、港口上岸觀光行程延誤或取消、遇到海盜、沉船等等,條款可能包唔晒。有啲保險會有附加郵輪保障,亦有啲專門為郵輪而設嘅保險,可以按情況選擇。

 

「外遊警示」可索償
投保之後,出發前一段時間,或者出發後政府向目的地發出紅色或黑色「外遊警示」,或因而滯留、提早結束或取消行程,都會有賠償,例如額外旅費、 公共交通費、住宿費,或者提早結束旅程但已經畀咗冇得退嘅旅費或訂金。所以買旅遊保險唔好等到臨出發前一、兩日先買,提早一個星期或以上買就比較穩陣。

 

生化核子恐襲不受保
一般旅遊保險都唔會包生物、化學或核子武器嘅恐怖襲擊。

凡事有例外,有保險包埋生物、化學或核子恐怖襲擊。

 

投保人年齡賠償有別
一般旅遊保險對象都係18至70歲,18歲以下或70歲以上,喺賠償金額方面可能會少啲,例如人身意外、醫療費用保障嘅最高賠償額只係正常投保額嘅50%,甚至更少。

 

記住以上要點,各位就可以揀到適合自己嘅旅遊保險,當然條款如何演繹,都係以保險公司為準。至於邊啲旅遊保險有優惠,下次再同大家分享。