王菲霆鋒1億築愛巢 明星愛巢集中喺邊區？

最近有報道指王菲同謝霆鋒復合後喺荃灣皇璧築愛巢，順便同趙薇做鄰居。明星住嘅地方當然私隱度夠高，仲要夠豪氣啦。香港話大唔大，話細唔細，相對於較冷門嘅荃灣，原來唔少明星情侶夫妻都選擇喺大埔區築愛巢，到底呢區有乜豪宅屋苑咁把炮？

 

王菲與趙薇做鄰居

 

兜兜轉轉，王菲同謝霆鋒喺2014年嚟個世紀復合，雖然有報道話霆鋒多次求婚，王菲都冇答應，但唔緊要啦，結婚都係「一紙之約」啫，唔結婚都可以一齊開心生活，況且2人各有各忙，未必成日見，保持情侶而非夫妻嘅關係可能係最佳安排。

話雖如此，常居於北京嘅王菲始終要間唔中落嚟香港同霆鋒相聚，所以可能有如報道指，王菲同前夫離婚後，就以一家公司名義，花1億分別購入黃竹坑深灣9號同荃灣皇璧高層複式、3,000幾平方呎豪宅單位，用嚟築愛巢。有傳佢入手皇璧呢個單位係有目的，事關好姊妹趙薇早喺2012年用1.2億買咗皇璧3個複式單位，打造香港嘅「行宮」，咁王菲嚟香港入住皇璧同霆鋒相會，表面上都可以話同好姊妹相聚啦。而且好姊妹同時係鄰居，屋企有乜需要打點嘅，都有個照應。

 

▼位於荃灣油柑頭嘅皇璧，有趙薇同王菲兩名星級業主

 

明星愛巢集中地：比華利山別墅

 

明星住得嘅地方，當然又豪又夠私隱度啦，咁到底有冇一個明星情侶或夫妻嘅愛巢集中地？答案係有嘅，就係大埔區嘅比華利山別墅。

 

前度或現任明星情侶居民：

 

陳豪、陳茵媺

方力申、鄧麗欣

張繼聰、謝安琪

黃浩、徐淑敏

羅仲謙、楊怡

陳慧嫻

 

▼比華利山別墅屋苑嘅大門已顯氣派

 

明星夫妻頻頻遷入

 

陳豪唔單止係好爸爸、好丈夫，仲係個精明嘅物業買家，佢喺2013年4月趁發展商劈價兩成清貨，以3,368萬買咗實用2,461方呎嘅雙號屋。及後2014年黃浩同老婆徐淑敏以2,800萬低價成功執平貨，賣家果陣慘蝕400萬。另外，已經分手嘅方力申同鄧麗欣都係前居民；流傳鄧數方嘅3大罪狀中，就提到2人冇買過樓或開公司，相信2人喺比華利山曾經築過嘅愛巢係租番嚟。

話明係明星集中地，啲星筆者未數完架。陀緊B女嘅謝安琪已經39歲了，係高齡產婦，一家之主嘅老公張繼聰早前就決定，舉家入住比華利山4,000幾方呎獨立屋。為咗畀妻兒一個五星級的家，唔怪之得張繼聰近排頻頻接job啦。不過要大肚婆謝安琪喺咁大間屋行嚟行去，唔知辛唔辛苦呢？

近期比華利山嘅明星新居民仲有羅仲謙同楊怡夫婦，以約$46,000價錢租咗實用1,902方呎嘅雙號屋。另外陳慧嫻亦月租$47,000租咗附近另一間雙號屋，同羅生羅太做鄰居。

 

▼謝安琪喺facebook post呢張相，寫上「親愛的，我回來了❤️」，顯示佢一家住喺比華利山別墅

 

▼楊怡嘟住嘴同羅仲謙結婚後，都係租喺比華利山

 

「買家墳場」啱晒明星自住

 

點解唔少明星都鍾意住比華利山別墅？首先明星嘅私生活常被關注，位處大埔三門仔嘅比華利山位置偏僻，私隱度高，明星情侶夫妻喺度築愛巢都唔怕畀人撞口撞面，狗仔隊又難進入屋苑偷拍。

仲有，遠望屋苑雖然似墳場，但唔少風水師都話呢度係風水寶地，你知啦，做藝人花無百日紅，風水嘅嘢真係寧可信其有。另外值得一提嘅係，呢度又被稱為「買家墳場」，近1年48宗成交可以做到30宗蝕讓，可謂現時超高樓價下嘅「逆巿奇葩」，而現時整體平均實用呎價同呎租分別約$12,000同$25，低過唔少中產屋苑，明星買嚟自住唔當投資，當然有着數啦。

 

▼有人話比華利山別墅遠睇似山墳

 

比華利山別墅簡介

 

位置：大埔三門仔

發展商：恒地

洋房數目：共535座（第1、2期共372座；第3期163座）

開售年份：2007年