【爽到爆】祖琪同你去 泰國潑水節
【爽到爆】祖琪同你去 泰國潑水節
相關信用卡:

【爽到爆】祖琪同你去 泰國潑水節

發表日期: 2016 年 05 月 30 日 更新日期: 2016 年 05 月 30 日 生活
作者:WING KI

 

中國嘅農曆新年大家就過得多,大家通常都會去親戚朋友屋企拜年同交換利是。而泰國嘅新年就好唔同,大家會過潑水節,一齊走上街互相淋水玩到顛,真係好開心。由於九龍城呢度有好多泰國人聚居,你見呢度可以搵到好多泰國餐廳就知,所以九龍城有「小泰國」之稱,而呢個傳統習俗,亦由泰國傳到嚟九龍城。
 


今次祖琪就同大家一齊過潑水節,感受泰國傳統新年氣氛。
當日真係非常之熱鬧,四圍都播住泰國歌,令我地好似置身喺泰國咁~ ^_^ 最好笑喺我地都帶咗副泳鏡諗住搞笑啲,但都我地一開咗直播,祖戴都戴唔切,我地就已經比十幾廿二個人用水槍射到我地講都講唔到嘢~

 

 


除咗潑水之外,佢哋仲會倒啲白色嘅粉(我地果日係爽身粉,唔知泰國係咩粉呢? :P )落人哋個頭/身。根據潑水節嘅規則,比潑同埋俾人畫花面貓嘅人唔可以嬲,因為係代表祝福,寓意今年會過得平平安安。

 

 

 

 


玩玩下嘅時候,TVB嘅劇組都嚟咗現場拍攝,有張繼聰同蕭正楠,大家見到明星就梗係瘋狂影相同埋瘋狂「祝福」佢哋,起晒咁向佢哋潑水。就算工作人員想保護佢哋都敵不過現場嘅民眾,最後佢哋梗係成身濕曬啦。

 

 

 

 


大部份在場嘅人全部都玩得好開心,不過都有例外架,我哋一去到現場嘅時候,就見到有個師奶話要報警,因為佢不滿比人射濕。不過講到明係潑水節,其實濕身真係在所難免,如果唔想濕就勸大家潑水節當日唔好去嗰條街啦~~~
有好多家長仲帶埋小朋友一齊玩,唔好以為小朋友就無咩攻擊力呀,現場嘅小朋友都玩得好落力,一見人就射,場面真係好搞笑。

 

 

 

 


玩完就梗係肚餓架啦,大家可以留意祖琪嘅潑水節特輯,睇吓我哋介紹九龍城嘅泰國美食。
【泰好食】祖琪帶你食好西 之 九龍城必食泰國地道菜

祖琪貼心小貼士:
雖然節日要投入玩得開心,但係都有啲規矩要遵守。例如唔好潑水去孕婦同老人家度,以免樂極生悲。
下年潑水節再見~我地祖琪祝大家泰國新年快樂!Sa Wa Dee Pee Mai ^_^