澳門．巴黎人酒店之旅

澳門又有新景點啦！就係威尼斯人旁邊嘅「澳門巴黎人」啦！酒店約有3000個房間，係酒店嘅前面仲有巴黎鐵塔添，聽講佢地係依照巴黎埃菲爾鐵塔1比2比例建造，酒店入面仲有好多唔同嘅設施。聽落真係好吸引呀，所以我就約埋我嘅好姊妹沙律一齊去澳門嘅巴黎人做返個「法國妹」啦！

因為聽說巴黎人酒店有好多嘢玩，所以我地決定去3日2夜，好好地放個靚假休息一下啦！不如睇下我地今次3日2夜嘅澳門之旅玩咗啲咩啦！

第一站 - Check in 澳門巴黎人酒店

澳門一般酒店都係2點鐘check in，但如果大家好多行季都可以放係lobby有存放行服務，講底自已check in名，酒店就會幫你送上房間㗎啦！

▲因為酒店外圍好靚，所以我同沙律1點左右就去咗酒店外圍影下相

▲目的地就係影依個1比2嘅巴黎鐵塔啦！實物真係好靚㗎！

▲而酒店門口都好有外國嘅感覺！

▲入到酒店右手邊就係check in的地方，裝修超豪華！

▲房間同床都超大，酒店窗景就會見到巴黎人嘅鐵塔添！

第二站 -巴黎人水世界

巴黎人酒店其中一個賣點就係水上世界，有架巨型海盜船㗎，雖然水上樂園佔地唔算大但勝在夠新，而且唔係酒店住客都可以入黎玩㗎！除咗巨型海盜船之外仲有條12米高嘅透明滑梯，大人都一樣啱玩！

所以我地check in完酒店換好衫就落咗去玩水世界啦！順便玩下水上樂園同游下水曬下太陽，可以過一個悠閒嘅下午！

▲巨型海盜船仲有比小朋友玩嘅滑梯

▲海盜船上面仲有好多機關，如果同一大班朋友玩一定超開心！

▲巴黎人水世界最大嘅賣點就係依個12米高嘅透明滑梯，真係可以媲美泰國嘅水上樂園呀！

▲我就派咗沙律玩依條滑梯！沙律話：滑梯真係幾高，如果無著Tee係外面減輕咗衫同滑梯嘅磨擦嘅話條滑梯真係會好快！如果大家想剌激啲嘅話，記得唔好著Tee呀！

第三站 -THRILLER LIVE Show

THRILLER LIVE係紀念全球流行巨星Michael Jackson嘅音樂劇，有好多表演者演繹好多Michael Jackson嘅大熱作品同招牌舞蹈，仲有專人扮Michael Jackson，裝扮同化妝都扮得超似，所有表演者都超唱得跳得，有啲歌者仲係參加過 <<英國好聲音>>同英國嘅<<超級巨星>>，所以只係聽歌都真係值回票價，到表演嘅尾聲，現場氣氛超興奮全場觀眾都起身跳舞，完全打破晒我對舞台劇嘅印象呀！

不過如果想睇依個Live Show就要係2016年11月13日前睇啦，因為佢地係一個限定Show，現今佢地已經踏足30幾個國家表演，演出過超過5000場，所以今次近近地澳門有演出而大家唔想錯過，真係可以為呢個Live Show而來，因為真係完完全全值回票價！

▲劇場可以坐到1200位觀眾，現場真係好熱鬧，好多人都同海報影相，所以我地兩個都唔例外啦，哈哈！