【潑水節特輯】祖琪帶你食好西 之 九龍城必食泰國地道菜

啱啱過咗去嘅4月10號係泰國潑水節，祖琪今年都去咗參加呢個節日，係九龍城玩到成身濕晒，真係好開心。玩完就梗係肚餓㗎啦，九龍城區有特別多泰國餐廳，不同類型不同檔次都可以喺呢度搵到。祖琪今次帶大家去食正宗泰國餐廳，同大家搵真·泰國味道。
 

呢間昌發泰國粉麵屋喺九龍城出晒名，因為佢款式多，價錢適中，而且質素仲好好添，啱晒我哋呢兩個泰國迷。兩間舖頭連埋一齊，座位唔多， 但都算坐得幾舒服。

 

 

一入到門口，已經聞到好大陣香味，見到鋪頭一邊貼滿晒各種款式嘅食物相，全部都好靚。款款有晒價錢明碼實價仲要唔使加一服務費。見到都流晒口水呀，講吓講吓，我同阿琪又肚餓啦，即刻叫呢度嘅招牌菜試食先。

(((祖琪廚房，食左先講。)))

遊船河

 

 

 

 

河粉同我地香港人平時食開嘅河粉唔同，比較闊身同厚身，就算浸耐左，個河粉都唔會散哂。材料都好豐富，有肉丸、豬潤、生菜同肉片，個湯底真係好正宗，有少少似滷水汁。
好食指數：8/10

泰東豬肉生菜包

 

 

 

 

生菜夠晒新鮮，咬落去索索聲。有好多豬肉，好香辣味同葱味，令我有少少諗起雲南嘅炒豬肉。生菜包埋豬肉一齊食好夾，份量都幾多，幾個人食都夠。
好食指數：8/10

冬蔭功海鮮湯（小）

 

 

 

 

食得泰國野又點少得冬陰公，要知道一間泰國餐廳有冇水準，一定要飲佢嘅冬陰公。我哋叫咗個海鮮冬陰公，味道辣得嚟啱啱好。我哋叫咗細碗，但都有好多海鮮，仲要全部都好新鮮，尤其啲蝦，咬落口好彈牙。
好食指數：9/10

沙嗲串(雞 + 牛)

 

 

 

 

平時有羊肉雞肉同牛肉三種，不過羊肉咁啱賣哂。就咁睇個串燒嘅賣相已經加哂分，烤得好靚。雞肉真係超嫩滑，又厚肉，加埋個甜甜地嘅沙嗲醬，真係堅好食。牛肉都唔錯，食完唔會痴牙。
好食指數：9/10

食泰國嘢一定要配嘢飲清清喉嚨，泰國有唔少特色飲料，祖同琪又點可以錯過呢！

龍眼冰

 

 

 

 

有好多龍眼肉，飲落去有陣清香嘅龍眼味，感覺有少少似菊花茶，食完咁多肉，飲番杯真係好舒服。
好飲指數：8/10

椰汁珍多冰

 

 

 

 

好香嘅椰奶味，入面有好多珍多冰，係一條條五顏六色好有咬口既嘢食，口感好得意。鍾意飲椰汁嘅朋友一定要試吓。
好飲指數：8/10

其實九龍城仲有好多間泰國餐廳， 對泰國嘢有興趣嘅你可以試吓去發掘下，可能有意想不到嘅驚喜。祖琪約定你下次再見！

地址：九龍城南道 25-27 號地下

是次消費：
遊船河 $ 35
泰東豬肉生菜包 $ 68
冬蔭功海鮮湯（小） $ 78
沙嗲串(雞 + 牛) $ 68
龍眼冰 $ 25
椰汁珍多冰 $ 30
總數：$ 304

付款方式：信用卡（Visa）/ 現金