機場購物賺現金券

除非你係從事航空業或旅遊業相關嘅工作，我相信大家去機場嘅目的通常都係搭飛機，送機或者接機，真係好間中先會去一次 (又除非你成日出Trip啦)。而大家喺機場幫襯得最多嘅，應該係上機前嗰一餐或者嗰杯咖啡，真係會係機場Shopping就可能少啲。

不過每次Lady C.都會買下化妝品，特別係DFS啲化妝品旅行裝，好似Bobbie Brown、Estée Lauder、Lancôme、SK-II，旅行裝Packing係得機場有，點忍得住唔買呢？而家銀聯仲做緊消費回贈優惠 (詳情)，喺機場商戶簽滿$4,000，就有$200機場現金券；如果簽到$10,000或以上，就有$700機場現金券，兩個Target都可以分兩張單累積計，買下酒、香水、化妝品，加上咁多名店，應該好易食到$200，爭在有冇嘢咁啱想買啫。


另外由而家至30號，機場50間舖頭亦同銀聯做Discount或者送贈品，例如好多食肆都做8折或9折，DFS Beauty幾個牌子專櫃都送贈品，當中買shu uemura彩妝產品滿$600 (Easy job啦)，就送昇級綠茶抗氧化潔顏油20ml一支，呢支嘢都幾好用㗎，20ml夠去旅行用。