《時代教主：喬布斯》應該叫《新手爸爸：喬布斯》？

《時代教主：喬布斯》上咗畫都有一段時間，不過反應就無大家對Apple嘅擁護咁激烈喎，雖然風評好好，仲已經喺金球奬到拎咗「最佳劇本奬」，但票房就普通喇！喺美國同香港開畫都低收，連成本都未追得返！究竟係Steve Jobs過身太耐，大家已經無哂性趣吖？定係大家愛嘅從來都只係apple，唔關喬布斯事？

電影Danny Boyle導演、金像編劇Aaron Sorkin編寫，Aaron Sorkin鍾意寫人物傳記，上一套寫講Facebook創辦人Mark Zuckerberg嘅《Social Network 社交網絡》風格同樣好鮮明，對白機關槍式發射，打個乞嚏都聽少10句8句。而今次嘅《喬布斯》同樣有呢種風格，對白主導；但劇情並唔係啲咩高潮起迭，勾心鬥角嘅嘢，故事甚至好少提及喬布斯係點樣成為商業奇才，仲講到1998年發佈第一代iMac G3就完咗，即係並唔會提到大家最熟悉嘅ipod、iphone、Macbook等等，Focus返喺喬布斯嘅處事性格同埋同囡囡之間嘅感情變化！講佢點樣由唔肯認個囡，到慢慢接觸佢，更著重講一個平時唔諗人感受嘅大男人學習做一個父親嘅心理描寫，套戲好似叫《新手爸爸：喬布斯》啱啲喎！呢樣野對觀眾嚟講可能就係期望上嘅落差嘞。


叻人通常都係特別麻煩同埋自我，電影入面嘅喬布斯都唔係一個好老公、好爸爸、好上司，甚至都唔係一個好人！唔通呢種就係天才嘅宿命？

不過引用戲中一句小妹好鍾意嘅對白作結：
It’s not binary. You can be decent and gifted at the same time.

最後提提大家，用匯豐信用卡去百老匯、AMC、星影匯睇戲都有9折，記得要去售票處買飛先有㗎。