支付寶實名制 淘寶有法

唔知各位淘寶係唔係用支付寶比錢呢? 最近支付寶要實名認證 , 要用國內銀行開行嘅戶口同銀行卡綁定戶口

如果唔綁定 , 5月20號開始就唔可以再用啦 , 用開支付寶淘寶咁點算呀!

唔洗驚 , 仲有其他方法㗎嘛~

實名認證方法

如果你有國內銀行發行嘅戶口同銀行卡 , 就可以綁定支付寶戶口

登入返支付寶戶口 , 喺< 賬戶管理 >嘅< 基本信息 >入面 , 喺姓名嗰度按< 立即認證 >

 

見到依個畫面 , 按< 立即認證 >

 

填返銀行卡資料 , 重要入埋銀行卡登記嘅手機號碼 , 即係要開多個大陸手機號碼呀

之後影低回鄉證正面 , 上傳做認證 , 大約24小時就可以認證到

 

退錢問題

之前用八達通同PPS淘寶 , 退款係會退去支付寶

但如果無實名認證 , 退錢去支付寶咪即係無咗啲錢?

大家唔洗驚 , 支付寶話系統升級之後 , 退款會退返去原來地方

即係八達通比錢 , 就會退返入八達通 , 唔會再入支付寶

 

其他淘寶付款方法

要做實名認證，要去大陸開戶口 , 又要有大陸手機號碼 , 都幾麻煩呀

如果你唔係經常返大陸 , 已經有依啲資料 , 用其他付款方法仲方便啦

我整咗表格比大家對比下

 

 

睇返個表 , 其實用PPS繳費靈或者八達通就最方便啦

因為大部分人都應該有依兩個戶口 , 而且手續費都係1.5% , 平過國際信用卡㗎

如果有中銀信用卡 , 可以用快捷支付 , 手續費都係1.5% , 不過AEON信用卡就要收3%

再唔係去便利店買支付寶購物卡 , 佢係類似儲值卡咁 , 可以入落支付寶戶口唔洗實名認證都用到㗎!