嚟緊又到復活節，大家會唔會去旅行玩下呢？去旅行自然要兌定啲外幣，今次就以好多香港人最愛嘅日本為例，講下點樣兌日圓好。
先查匯率
兌換外幣最首要嘅，當然係匯率，而每間銀行或找換店都有唔同匯率，兌錢前梗係要格下價。除咗直接上銀行或找換店睇當日匯率，相信大家都可能會知道TTRate呢個網站，佢集合咗有外幣兌換服務嘅銀行同找換店匯率，大家可以格完價再揀去邊度換。
銀行找換
某啲銀行會有日圓現鈔提供，不過一般都會收手續費，呢個因素比匯率更重要，因為非銀行戶口持有人由$40至$150不等 (不過有戶口亦可能要收手續費)，即使一間銀行匯率高但手續費低，隨時係抵換過匯率低而手續費高。不過如果可以的話，我會建議用其他唔收手續費或收少啲手續費嘅方式換錢。
舉個例子，以非客戶計：
銀行 / 外幣兌換手續費 / 每百日圓現鈔賣出價 (3/28)
永隆 / $40 / $7.06
華僑永亨 / $100 / $7.075
東亞 / $150 / $7.073
如果兌200,000日圓：
永隆－$14,120 + $40 = $14,160
華僑永亨－$14,150 + $100 = $14,250
東亞－$14,146 + $150 = $14,296
可以見到，雖然東亞匯率抵啲，但手續費貴啲，反而冇匯率貴啲嘅華僑永亨咁抵。
外幣戶口兌換
經銀行網上理財將錢過落外幣戶口，再去銀行攞錢都係一個方法，電匯價甚至會比找換店匯率更好。之前我試過用渣打綜合儲蓄戶口，經網上理財轉成日圓，再落分行排隊拎日圓現金。當時匯率100日圓=$7.55，找換店$7.54，其實都唔差。雖然渣打唔收手續費，但其他銀行可能都會收，兌之前記得問清楚銀行。同埋可能要提早一、兩日聯絡銀行CS，想喺邊間分行攞錢，叫佢安排現鈔。
優點：方便，可揀附近銀行，匯率可能較佳
缺點：需要預早過數同聯絡銀行安排，有可能收手續費
轉錢入日圓戶口，就可以聯絡銀行安排攞錢。
香港櫃員機撳外幣
匯豐有部分櫃員機係可以直接撳到外幣，包括日圓，美元，歐元同人民幣。至於匯率，匯豐可能冇抄換店咁好，但撳機勝在極方便，24小時都得，第二朝一早飛但唔記得唱錢都唔使驚。
優點：方便，24小時可換
缺點：匯率可能較找換店高
匯豐大約有15個地點可以撳外幣現鈔。
只提供10,000日圓現鈔。
找換店兌換
坊間有唔少出名嘅找換店，喺TTRate都會見到佢哋個名。去找換店換嘅原因，主要係匯率較好，亦唔收手續費。
不過呢幾間找換店，有啲六點半就收工，放工未必趕到過去。重慶大廈入面有唔少找換店，會開到八、九點，而且匯率唔比出名嗰啲差。附近美麗都大廈亦有幾間找換店，不過好似都係重慶大廈嗰邊匯率好啲。另外，大家亦不妨Google下找換店，有啲唔喺TTRate入面，都可以做到平匯率。之前我都喺觀塘搵到一間找換店兌$6.8，同堅成、百年一樣，仲慳咗車錢同時間。
有啲找換店3月28號嘅每百日圓現鈔賣出價做到$7.04，兌200,000日圓 ($14,080) 比起做緊$7.06 ($14,120) 嘅銀行慳返$40。另外，如果有外幣戶口，轉錢入去用電匯價 ($7.03X) 兌仲抵過找換店。
優點：匯率較好，毋須手續費
缺點：未必有分店，需要專程去換錢，較花時間
放工去到重慶大廈，堅成已收工，都仲有幾間找換店開緊。
3月27號堅成100日圓兌$7.05，重慶大廈有一兩間找換店都做緊$7.06，相差不遠。
海外櫃員機撳錢
有唔少人去日本都會去當地便利店或銀行，出發前開咗海外提款功能，就可以用提款卡或者有連結銀行儲蓄戶口嘅信用卡，經銀聯網絡由儲蓄戶口撳日圓，每次收大約$15至$25手續費，匯率亦唔會太差。就算掃貨掃到彈盡糧絕，卡都爆埋，都仲可以叫人入錢落戶口再撳。
優點：方便，喺外國亦可隨時拎現鈔
缺點：需收取手續費，就算匯率唔好都要硬食
試過喺日本銀行撳2,000日圓，除咗銀聯$15手續費，銀行再收110日圓手續費。
機場找換店
雖然香港或日本機場都有找換店，但通常望下個價錢牌之後就會掉頭走，因為匯率都會貴啲。除非身上賺係唔夠錢搭車出市區，又或者冇支援銀聯嘅櫃員機，否則一般都唔會喺機場唱錢。
優點：慳時間，喺機場即時兌換
缺點：匯率較貴
匯率 VS 手續費 VS 時間
兌外幣要抵，匯率佳，唔使手續費，又近屋企 / 公司就梗係最好，不過如果兌嘅金額唔多，有時去附近銀行、找換店或用其他方法換，計埋車錢成本可能同專程出去匯率好啲嘅地方唱錢差不多，仲可以慳返來回時間。