廉航有幾廉？
更新日期: 2013 年 09 月 17 日
講開機票，上星期廉航單新聞可以話係所有熱愛旅行既人士的福音！雖則話7條航線入邊唔包我之前話想去既首爾，廉航又比一般航空多限制，但有多個選擇點都係好事！坦白講，因為廉航既出現，我亦都心多多想改變行程……(其實Lady C.以前都係諗都唔諗就衝去旅社，用真金白銀出機票既人。今日，醒左小小既我當然識得碌大雙眼搵多些少著數啦！)
東京、大阪、台中、布吉同沙巴……每個地點我都有興趣，但我更想知道既係，到底廉航係唔係真係咁廉？定係其實同傳統航空公司做推廣時既價位相差無幾？用飛行里數換獎勵機票又要儲幾耐？
沙巴既日落真係一流呀…
沙巴既日落真係一流呀…
論平，Lady C.覺得廉航有絕對優勢。就以香港快運為例，飛東京來回票價約$1,500，計埋行李託運費及自選機位位置等既額外收費，估計來回票價約$1,900（未包約$700稅項）；而傳統航空公司如日本航空，飛東京來回機票就要約$3,400，兩者價位差成倍咁濟！不過值得注意的是，唔少廉航航班都喺凌晨升降，萬一唔好彩遇上航班延誤或取消，廉航公司亦較少安排轉機。因商務而搭可能就對出發同抵達時間冇咩所謂，但去旅行喎，相信唔少人都會好似Lady C.咁堅持揀早機去晚機番！下下凌晏機會蝕晒D時間嘛！至於廉航唔包飛機餐呢個問題……其實去東南亞咁近，個零兩個幾鐘機唔食都唔覺蝕，而且分分鐘可以當留肚去當地食好嘢！
睇返Lady C.我搵資料搵到眼都盲既上表，其實唔難發現傳統航空如果做特價，好似國泰 / 港龍逢星期二推一次既fanfares咁，只要撲到飛，價位要同廉航睇齊甚至更抵都係有可能既事。拿大阪作例子，計入附加費之後，我相信廉航極其量都係平特價機票一二百蚊左右……換個講法係加多一二百就可以由坐廉航變做做國泰 / 港龍，感覺就好似升左級咁。只係等fanfares、特價推廣同玩老虎機差唔多，想撞正出發日期、地點全部OK仲要搶得到，尤其係熱門地點如東京、上海呢類，唔夠神心早起身，真係等到花兒都謝了x2046。
愈諗愈覺得真係要努力D學習下儲飛行里數先得，睇見一早出卡既朋友轉個頭又話D分就夠期要換機票飛台北一轉，真心羨慕佢可以唔覺唔覺買下嘢交下費，就又儲夠里數幾乎免費咁衝上雲霄。計計數，去布吉要30,000飛行里數，即係話視乎我選擇用邊張卡儲，目前黎講最少要簽$180,000(本地簽賬)！聽落個數唔係短期可以完成既目標，但有志者事竟成，我都係去留意多D有關里數既推廣，同決定左出邊張卡儲里數先再算……
至於我最後決定去邊呢個問題……最後答案——東京！