小米4登場 唔使急住買

近年小米呢個名都幾響，因為佢啲產品以抵食夾大件聞名，例如二千蚊左右就可以買到接近大牌子旗艦手機頂級規格，又或者$1,000都唔使嘅中階手機，性價比好高。

早兩日小米喺北京開發布會宣布推出小米4手機，小米老細雷軍著住黑T恤牛仔褲出場，講解小米4有幾勁，後尾打咗一句「One more thing...」出嚟，再介紹小米手環，咦，個格局咁熟面口嘅？

講返部機先，今次佢玩金屬邊框，佢配備 Qualcomm Snapdragon S801四核心2.5GHz CPU、3GB RAM、5吋1,080p 屏幕、1,300萬像素後置鏡頭、3080mAh電池、同而家各大牌子嘅旗艦機嘅規格差不多。小米16GB版賣$1,999人民幣，64版就賣$2,499人民幣，比起其他旗艦機，仲係平一截。雖然小米4會喺29號開賣，但我勸大家唔使心急住，因為呢一次係賣係聯通3G版，喺香港用只支援到3G、雖然9月會有移動4G版，但大陸中國移動嘅4G係TDD-LTE制式，同香港主流嘅FDD-LTE制式唔同。而要買香港真正用到嘅4G版本，要等到年底。不過到嗰陣時，可能又有更新更勁嘅機出。

如果真係想買，可以睇下邊張卡有網購優惠或獎賞。因為係去小米大陸官網買，亦可以留意下有外幣交易 (記住唔係海外簽賬) 獎賞嘅卡。