香港科技大學係第三間正式公佈大專院校嘅電腦優惠嘅嘅大學，今年有Apple、ASUS同Lenovo，網上預訂由今日 (8月11號) 開始，Roadshow就會分兩次，分別係8月18號至23號，同埋9月10號至9月20號。各位想買電腦嘅科大學生、舊生、教職員，埋嚟睇下有冇邊部機啱心水啦。
今次係第三次講Apple優惠，睇情況基本上間間大專院校都會有佢份。折扣情況同其他學校都係一樣，減價後同Apple教育商店扣埋$800禮品卡差不多，去邊度買就視乎你想要禮品卡還是直接減機價。
至於ASUS，$5,000樓下嘅Notebook選擇都有6部，而佢部Zenbook UX303LN望落去有啲似MacBook Air，個Mon嘅解像度係QHD+ (3,200 x 1,800) ，仲有獨立顯示晶片，輕量化得嚟效能亦OK。
Lenovo方面，同理大個價都係一樣，不過多咗一部10.1吋嘅IdeaPad Flex 10，屬於入門級，有Touch screen，類似平板電腦同以前Netbook嘅混合體。當然，識得買，梗係買ThinkPad系列，X240同X1 Carbon都係首選，因為ThinkPad出咗名耐用，而且呢兩個Model都夠輕便，女同學帶住返學都唔會咁重。
ASUS Zenbook UX303LN都做得幾薄。
雖然ASUS仲有兩部Desktop可以揀，不過都係文書機。
至於用咩信用卡好，可以參考返之前兩篇大專院校電腦優惠介紹，賺得多啲嘅有中銀同埋建行(亞洲)，網上訂機用中銀i-card。另外，富邦Titanium MasterCard逢星期六、日每滿$300或以上，簽$1賺2分；而滿$600或以上，可以打去參加抽獎，贏額外積分 (不過抽獎資格唔包網上訂購)。建行(亞洲) 銀聯雙幣卡簽過$2,000，之後超出嘅金額就有5X積分。
【8月22號更新】原來科大都有Microsoft Surface Pro 3，入去ASUS或Lenovo，喺版面上面會見到「Surface」，Click入去就見到。有三個Model，包括Intel Core i3 / 64GB SSD、i5 / 128GB同埋i5 / 256GB，減價後比正價平$800至$1,500，可配埋黑色鍵盤保護蓋，平過正價$150。