外遊租Wi-Fi蛋筍過買sim卡

去旅行係離開香港，但始終都離唔開互聯網。上網搵地圖、搵食、搵景點，有得上網方便好多，唔通大街大巷打開成米長嘅地圖咩？咩年代呀？仲有要上面書同Instagram曬命呢？所以去旅行，為咗解決上網問題，唔少人都會租隻Wi-Fi蛋，但租間公司嘅蛋好呢？令次就等筆者教大家啦。

 

▼有Wi-Fi蛋，咁喺外地就可以上網啦。

 

sim卡數據易用爆

 

去旅行上網，唔一定用Wi-Fi蛋嘅，都有人選擇用sim卡。咁到底租隻Wi-Fi蛋定係買sim卡化算，咁就要睇你去到外地點上網法。

首先講sim卡，sim卡係畀一個固定費用，喺某段日子內上網，雖然日均嘅價錢平，但可能得果幾GB數據，萬一上網上多咗，超過數據上限，突然上唔到網都幾麻煩，吓吓監察住個數據使用情況又唔方便。當然有啲sim卡唔會限你用幾多GB，但數據用得多或到咗繁忙時間就會限速，都幾多掣肘。

 

 

有人選擇喺鴨記平平哋買定張外地sim卡落機用，但人在外地，萬一張sim卡唔work或自己唔識用，都唔知點算好，而且外地網絡制式與香港可能唔同，有人試過落機先知中伏，標榜嘅4G慘變得2G，甚至有個案係用唔到！所以唔係好識搞嘅人都係落機後喺機場sim卡櫃位買返張好，起碼有乜唔明都可以問清楚。

不過落機買sim卡又衍生一個問題，就係櫃位有限，喺繁忙時間，多位旅客同一時間買sim卡，隨時花上1至2個鐘頭喺排隊買，筆者就試過喺台灣桃園機場等咗個幾鐘頭先買到張sim卡，結果之後嘅行程失咗少少預算。

 

▼sim卡數據唔少都係得果幾GB，而且有喺外地用唔到嘅風險。

 

用Wi-Fi蛋唔使煩

 

至於Wi-Fi蛋就唔同了，現時Wi-Fi蛋租用公司愈開愈多，收費都係1日幾十蚊，喺香港上機前取蛋，到外地一落機多數一開蛋，在裝置輸入密碼就用得，而且通常都係無限上網，network可供多人使用，所以計使用上嘅方便快捷嘅話，Wi-Fi蛋遠比sim卡優勝。

不過要提醒大家嘅係，雖然唔少Wi-Fi蛋租用公司都標榜佢哋嘅Wi-Fi蛋係「無限上網」，但實際上服務都受「公平使用政策」限制，部分Wifi蛋上網上到一個流量就會出現限速或中斷網絡，要翌日先可以再上網，而且多數公司都唔會主動提及，建議租用前要問清楚。

話雖如此，sim卡收費為一次性，如果唔多上網，計返每日平均使用嘅價錢往往比日計嘅Wi-Fi蛋平，但如果要頻頻將影嘅相即時上載facebook同instagram呃like，而且與多名友人同行嘅話，筆者建議租Wi-Fi蛋好過。

 

 

Wi-Fi蛋租借公司數量多，依家筆者就用Google搜尋到的頭3間公司，即係Wifi Egg、維訊數據同Crazyegg，比較吓佢哋嘅服務，再總結應該點樣選擇Wi-Fi蛋。

 

Wifi Egg按金太貴

 

第一間拎出嚟比較嘅公司係Wifi Egg。呢間公司要求客人租Wi-Fi蛋最少租3日，喺尖沙咀、銅鑼灣同元朗門巿提取同歸還Wi-Fi蛋不另加收費，但若果懶或唔得閒唔去攞，要速遞到工商地址，則要收取$30運輸費；去完旅行又以速遞方式歸還嘅話，同樣要收取$30運輸費。租蛋費用方面，港人最常去嘅日韓台，Wi-Fi蛋都係日租$40，由於最少要租3日，即最低消費要$120。不過要注意嘅係，呢間公司每次租蛋都會事先收你$1,000按金，歸還Wi-Fi蛋時先會退返。

 

 

 

維訊速度較慢

 

第二間係維訊數據，租借日數都係最少3日，按金$500。提取及歸還方面，因為機場兩個客運大樓均設有交收地點，咁就唔使出發前冋返港後來回門巿，但要注意佢哋嘅Wi-Fi蛋傳輸速度唔夠快，未必應付到多人同時上網所需。

 

▼維訊數據在機場兩個客運大樓均設有交收地點。

 

 

 

 

Crazyegg日租最平

 

至於第3間要拎出嚟比較嘅係Crazyegg。佢哋最少租借日數為4日，日韓台嘅數據速度都是標榜4G，惟未有明確講明幾多Mbps。呢間公司唔少租借計畫都做緊減價，喺12月31日前出發去日韓台嘅48小時前預訂，三者優惠價為日租$25，價錢嚟講係非常便宜。大家以銀行過數租用呢間公司嘅Wi-Fi蛋，係要同時支付$500按金，還蛋時先獲退款。至於用信用卡畀錢嘅，畀錢時會保留你$500信用額，完璧歸趙時者問過會解除。

 

 

 

Crazyegg方便快捷

 

好喇，羅列咗3間公司嘅服務，咁租邊間嘅Wi-Fi蛋最好？如果從價錢睇，維訊數據可以即刻foul出局，因為首先佢嘅價錢係三者中最貴，而且傳輸速度較慢，冇人諗住租個Wi-Fi蛋會上網慢，唯一唔輸蝕嘅地方係機場有得交收，客人就唔使咁頻撲去攞蛋還蛋。

 

▼韓國嘅電話網絡制式與香港有別，基本上冇乜sim卡啱用，為安全計，都係租隻Wi-Fi蛋好。

 

咁Wifi Egg同Crazyegg又應該揀邊間呢？筆者其實會揀Crazyegg。雖然Wifi Egg嘅Wi-Fi蛋上網速度都快，標榜日本有成150Mbps，台灣又有100Mbps（韓國較少，只有75Mbps），但衰在冇得機場交收，要去門巿，按金又要成本$1,000咁貴。去旅行出發前同返港後通常都好忙，邊有時間交收呢？Crazyegg按金只係$500之餘，又可以機場交收，最重要係依家做緊優惠，租蛋去日韓台都係每日$25，又平又方便又快捷。

不過，Wifi Egg都唔輸得晒，佢哋嘅Wi-Fi蛋電量可以用到8至10個鐘，時間較Crazyegg嘅6至8個鐘長。

其實坊間仲有好多Wi-Fi蛋租借公司，以上3間公司嘅比較資料僅作參考，目的係為大家指出需要留意嘅地方，而且收得好唔好，去到外地先知。所以大家都係最好喺租用前了解清楚，睇吓佢哋嘅口碑，再選擇最適合旅程用嘅Wi-Fi蛋啦！

 

美國運通 x ZUJI優惠

 

睇得Wi-Fi蛋嘅人，多數有意或已計畫去旅行。依家客戶憑美國運通卡嘅會員到ZUJI預訂機票，最多可獲$500折扣現金折扣！

 

長線航點機票：
應用此優惠券代碼：AEHKLH500M12
每個機票預訂享HK$500即時折扣

短線航點機票：
應用此優惠券代碼：AEHKSH200M12
每個機票預訂享HK$200即時折扣

套票(只適用於星期五、六、日)：
應用此優惠券代碼：AEHKDP300M12
每個套票預訂享HK$300即時折扣