外國網購唔送香港點算好？

雖然而家好多大型購物網站都Support全球速遞送貨，不過仍然有啲購物網站只送本土，好似我咁，有時明明見到啲Printed Tee同波鞋好鍾意，但就係唔送貨嚟香港，真係得個恨字。我有朋友喺美國，以前我會填佢地址送貨去佢度，然後等佢寄返嚟俾我，不過寄得幾次我都唔好意思再麻煩人地。

收貨地點一揀香港，即刻話冇送貨選項。

好在網上愈來愈多網購轉遞服務，網購時可以填轉遞服務嘅地址，佢哋會代你收貨，再以你選擇嘅郵遞方式寄返俾你。有啲網站除咗冇全球速遞，亦唔接受海外信用卡俾錢，有啲轉遞服務亦有提供代購。有啲轉遞服務可以會幫你重新Pack過件貨，大盒轉細盒，慳返啲位，又可以集合幾個唔同網購嘅貨再一齊寄，唔使分開寄，慳多啲郵費。另外好多購物網站，特別係美國，寄本土地址會有郵費優惠，甚至免郵費，就可以利用呢一點，集中啲貨一次過寄，都可以慳到錢。（當然，等齊貨再寄，時間可能會耐啲。）仲有，如果轉遞服務提供嘅收貨地址係屬於免銷售稅地區或州分，就再慳一筆。而部分網購轉遞服務，例如comGateway、DimBuy、Borderlinx，都有同本地銀行合作，運費有折。

轉遞流程。

雖然網購轉遞服務有唔少好處，但係亦要留意：
－運費可能用重量或體積計，空運通常會用「體積重量」計 (包裹體積 / 特定基數)，輕身但大件嘅貨，運費可能會好貴。
－重新Pack貨、集合轉遞服務可能需要另外收費。
－網購有時會貨不會辦，要注意轉遞服務嘅退貨手續同收費。
－網購轉遞服務會有貨品限制，例如貴重品、違禁品、危險品、利器、易燃或揮發性物品 (香水、指甲油)、酒精類、部分包含鋰電池嘅電子產品等等。