回贈新玩法 DBS Eminent Card外幣簽賬$3.6=1里數

DBS Eminent Card一向主打網上同海外簽賬6%現金回贈，之前到期之後就冇再延期，變到好似冇晒特別著數咁。最近佢終於出咗新嘅回贈計劃，仲有新嘅迎新優惠，想知點玩，請睇落去。

搵子華哥做代言人，假如遲啲佢再開Show，唔知呢張卡有冇得優先買飛呢？

 

白金卡更普及
本來DBS Eminent Card只有Visa Signature，年薪要$360,000 (之前有試過$240,000)，而家出埋白金卡，年薪要求$150,000，容易啲啲申請到。

左邊Visa Signature版，右邊白金卡版。

 

3種無上限回贈計劃
優惠期至：12月31日
冇咗6%回贈，就有返3種回贈計劃，包括本地簽賬、海外簽賬同本地食肆簽賬。同之前6%回贈需要每月簽滿$5,000，回贈上限$300相比，新回贈比率雖然冇咁高，但勝在冇最低簽賬要求，亦冇上限，簽幾多賺幾多。至於近期各位都好關心嘅電子錢包增值，即係PayMe、WeChat Pay之類，係計1%回贈。

其實本地食肆簽賬即係之前本地食肆3X DBS$優惠，只係改咗名咁解。根據條款，「有關於香港的食肆所進行的合資格簽賬（「本地食肆簽賬」）可獲之獎賞，請參閱下述第c條條款。」，本地食肆簽賬應該係唔可以夾埋本地簽賬一齊賺。

本地簽賬：1% (簽賬$250=DBS$2.5，已包括基本回贈，無回贈上限)
外幣簽賬：2% (簽賬$250=DBS$5，已包括基本回贈)
本地食肆簽賬：1.2% (簽賬$250=DBS$3，已包括基本回贈)

DBS$72可以換1,000「亞洲萬里通」里數；DBS$32可以換1,000「鳳凰知音」里數。每次兌換每5,000里數，收手續費$50，最高收$300。

換「亞洲萬里通」里數：
本地簽賬：$7.2 / 里數
外幣簽賬：$3.6 / 里數
本地食肆簽賬：$6 / 里數

本地同本地食肆就唔算特別抵，外幣簽賬$3.6=1里數都唔錯，一般里數卡都係$4=1里數，即使DBS Eminent Card要畀兌換里數手續費。

換「鳳凰知音」里數：
本地簽賬：$3.2 / 里數
外幣簽賬：$1.6 / 里數
本地食肆簽賬：$2.67 / 里數

「鳳凰知音」里數除咗可以換中國國際航空、深圳航空、山東航空、澳門航空等國內航班，由於佢係星空聯盟成員，亦可以換其他聯盟成員機票。

另外，「鳳凰知音」里數都可以換國泰或港龍機票，當中最特別係去歐洲，用Asia Miles換商務艙要120,000里數，頭等艙要180,000里數；用「鳳凰知音」里數換商務艙只要95,000里數，頭等艙110,000里數，加上里數簽賬成本亦比較低，更加抵換。但係換機票要打去熱線甚至親身上國航辦公室辦手續，上網換唔到，冇咁方便。

 

逢星期五、六戲票買一送一
優惠期至：6月10日
DBS信用卡本身有The Grand Cinema戲飛8折優惠，DBS Eminent Card加碼再推逢星期五、六買一送一，每張卡每日最多可獲4張免費戲飛，買飛時只可以用8折或買一送一其中一個優惠，唔可以一齊用。

 

迎新8%現金奬賞
優惠期至：5月31日
優惠：
頭2個月簽賬滿指定金額，會有現金獎賞，無最低簽賬要求。
新客戶：$1,000現金獎賞 (賺盡簽賬$12,500)
現有客戶：$500現金獎賞 (賺盡簽賬$6,250)

不合資格交易：
電子錢包增值(PayMe、WeChat Pay等)
網上繳費
跨境港幣交易

 

總結－外幣簽賬換里數較抵
之前網上同海外簽賬有額外6%現金回贈，加埋基本DBS$回贈，以現金回贈計可以話係好抵。而家改為回贈DBS$，本地1%外幣2%食肆1.2%，回贈率唔算特別高；但DBS$可以集中返嚟換里數，特別係以外幣簽賬計，可以做到$3.6=1 Asia Miles里數，算係里數卡之中較抵用。

 

經我哋申請，仲有額外$200現金獎賞同$100禮券送，詳情：
DBS Eminent Visa Signature Card
DBS Eminent Visa Platinum Card