更新日期: 2014 年 07 月 15 日
近年好多大型國際酒店同娛樂集團進駐澳門,為咗吸引遊客,經常舉辦好多大型表演,當中有唔少仲係國際級數,令澳門除咗賭,飲飲食食之外,仲多咗好多Show睇,我哋香港人就可以近近地都可以睇到啦。
而家澳門最出名嘅Show就梗係大型綜藝表演,例如《水舞間》,《TABOO色惑》呢類歌舞劇,相信大家可能都有睇過。除咗呢啲,時不時都會有魔術、馬戲團、雜技等等,例如下個月魔術大師Franz Harary就喺新濠天地澳門君悅酒店搞《驚世魔術匯演2014》,上年佢同我哋嘅薛凱琪合演咗一幕驚險嘅逃生魔法表演,今年Franz Harary會聯同另外三位魔術師匯演,應該會好精彩。另外仲有《Nitro Circus玩命特技現場秀》馬戲雜技表現。