匯豐Visa Signature賺分三倍Up

最近匯豐出咗張新嘅Visa Signature卡，雖然暫時冇迎新優惠，但係佢有個好強嘅功能，就係喺原本「最紅自主奬賞」計劃入面所有簽賬類別消費，首$120,000簽賬都自動有額外3X「獎賞錢」，唔使登記。如果夾埋6X「最紅自主奬賞」再加5X「最紅星期五」，用呢張卡簽賬，就有14X「獎賞錢」，簽$250就賺$14「獎賞錢」，而$250=$1「獎賞錢」=15 Asia Miles里數，計返即係$1.19=1里數，極好賺！而「賞中華」同「賞世界」包括中國同海外消費(手續費1.95%)，所以海外簽賬就算冇分到「最紅自主奬賞」亦變成4X「獎賞錢」，未計手續費大約係$4.17=1里數，貼近其他$4=1里數嘅卡。而我哋嘅會員已經喺度熱烈討論緊，大家可以去討論區睇下咁多位積分里數達人有乜見解。

不過要申請呢張卡並唔係咁易，年薪要$480,000，或者有$600,000資產，門檻同其他Visa Signature卡一樣高，我就兩樣都冇喇。而且年費要$2,000，我哋好多會員都好關心呢個問題，佢哋打過去CS問，又Send過Email問，有人話有得Waive有人話冇，我打去問都係話冇，不過CS姐姐話可以去分行申請，睇下搲唔搲到Staff比你免首年年費，我再問之後簽滿某個數有冇得Waive，佢話可以喺年費到期前打去Hotline問下，其實算唔算冇呢？如果真係Waive唔到，好賺程度自然降低。咁到底出唔出呢張卡好？可以等多陣睇下遲啲有冇迎新，特別係免年費先再決定。