刺身控必試 層層疊刺身丼

作為刺身控嘅我，次次見到新鮮美味嘅刺身都會流曬口水啊！但平時食到嘅刺身丼都唔足料, 成日都食剩啲飯，今次我就搵到一間位於九龍城嘅日本菜店鋪，佢地刺身丼啲刺身堆到好高好高，鍾意食魚生嘅你又點可以錯過呢？

渡辺屋用嘅食材新鮮，全部都由日本運過黎，佢地用嘅米亦都係日本米，夠曬高質。雖然渡辺屋主要做外賣，但都有幾張台擺喺外面，唔想叫外賣嘅，都可以企喺度食架！

渡辺屋嘅三色刺身丼五顏六色，真係可以話色香味俱全！

• 橙色嘅赤丼（$68）堆滿啖啖三文魚肉，碗邊就堆滿三文魚子同飛魚子，粒粒都卜卜脆！

• 黑丼（$78）係用新鮮墨魚汁製成，中間堆滿嘅唔係三文魚啦，而係貝殼類海鮮，例如海蝦同帶子，咁多種海鮮配埋一齊食，都幾夾！

• 青丼（$78）同樣都係用貝殼類海鮮製成，青蟹子係芥末味，但食落唔會太辣，而頂部嘅醬料就係由新鮮牛油果、忌廉同沙律醬製成，配埋青蟹子一齊食，好Fresh啊～

店長仲推介海膽盛丼（$108）同浦燒鰻魚丼（$68），因為兩個丼都好足料，好抵食！

• 海膽盛丼用左全板北海道馬糞海膽，對於鍾意食海膽既我黎講，一個字，正！

• 浦燒鰻魚丼用作成條鰻魚都係＄68咋！啲肉好厚好肥美！

其實行過幾條街，有另一間相同老闆開既拉麵店（浜滝 Hamataki），除左有熱辣辣嘅拉麵食之外，仲有各式各樣嘅日本酒同佐酒小食。除此之外，佢地仲會不時入新貨，想食季節性嘅新鮮食品，絕對可以黎試一試！

 

渡辺屋

地址: 九龍城衙前圍道122號地下H舖

電話: 2623 6693

營業時間： 11：00am - 10：30pm