入油優惠賺里數自動轉換賺2倍惠真係抵？用信用卡賺更多！

之前曾經同大家介紹過，埃克森美孚 (Esso) 同蜆殼都係亞洲萬里通合作夥伴，入油可以儲里數。最近Esso有新限時優惠，入油積分自動轉換有2X里數，聽落好似有著數，但係咪真係抵呢？今次又同大家計下數，順便講下用信用卡點儲里數。

賺2X / 1.5X里數
Esso Smiles會員喺8月15日或之前成功登記Esso Smiles積分自動轉換「亞洲萬里通」里數服務，喺8月31號或之前入Synergy Supreme+特級汽油或Synergy Extra汽油，分別會有2X或1.5X積分，變相可以換到2X或1.5X里數。

優惠資格
所有Esso Smiles車主獎賞計劃會員都可以參加，喺8月15號或之前經網上或喺油站拎表格成功登記Smiles積分自動轉換為「亞洲萬里通」里數服務。

部分會員冇得用呢個優惠：
－推廣期之前已登記Smiles積分自動轉換為「易賞錢」積分服務；
－Esso車隊咭及折扣咭客戶；
－推廣期內登記Esso Smiles積分彈性轉換為「亞洲萬里通」里數服務。

轉回自動轉換須等半年
條款有講，Smiles會員登記Esso Smiles積分自動轉換「亞洲萬里通」里數服務頭6個月內唔可以取消。即係如果想轉返做彈性轉換，就要等6個月。由於係自動轉換里數，所以亦冇得用Smiles積分當油錢。

里數轉換計算
基本每5 Esso Smiles積分可以換1里數：
原本入一公升Synergy Supreme+特級汽油，可以賺到15分，即係3里數；
入一公升Synergy Extra汽油，可以賺到10分，即係2里數。

Smiles會員每公升汽油有即減$0.9優惠，按照消委會公佈嘅油價 (6月1號) 計：
每公升Synergy Supreme+特級汽油 = $16.16 - $0.9 = $15.26 / 3 = $5.09 / 里數
每公升Synergy Extra汽油 = $15.04 - $0.9 = $14.14 / 2 = $7.07 / 里數

喺限時優惠之下：
入一公升Synergy Supreme+特級汽油，2X可以賺到30分，即係6里數；
入一公升Synergy Extra汽油，1.5X可以賺到15分，即係3里數。
每公升Synergy Supreme+特級汽油 = $16.16 - $0.9 = $15.26 / 6 = $2.54 / 里數
每公升Synergy Extra汽油 = $15.04 - $0.9 = $14.14 / 3 = $4.71 / 里數

先轉「易賞錢」再轉里數
Smiles積分可以轉做百佳「易賞錢」積分，而百佳「易賞錢」積分又可以轉做「亞洲萬里通」里數，之前計過用呢種方式轉換，係會比直接由Smiles積分轉里數抵，同限時優惠比較又會係點呢？

彈性轉換做「易賞錢」積分：
300 Smiles積分 = 500「易賞錢」積分
1,500 Smiles積分 = 2,500「易賞錢」積分
2,400 Smiles積分 = 4,000「易賞錢」積分
3,600 Smiles積分 = 6,000「易賞錢」積分

「易賞錢」積分轉做里數：
第一組兌換額：400「易賞錢」積分 = 100里數
第二組兌換額：800「易賞錢」積分 = 200里數
其後每組兌換額：400「易賞錢」積分 = 100里數
每日最高兌換額：40,000 「易賞錢」積分轉換 10,000里數

即係2,400 Smiles積分 = 4,000「易賞錢」積分 = 1,000里數。
要儲2,400 Smiles積分，就要入160公升Synergy Supreme+特級汽油或240公升Synergy Extra汽油，就可以儲到2,400 Smiles積分：

Synergy Supreme+特級汽油：$15.26 x 160 / 1,000 = $2.4416 / 里數
Synergy Extra汽油：$14.14 x 240 / 1,000 = $3.3936 / 里數

即係有2X或1.5X積分限時優惠，都係唔夠轉做「易賞錢」積分再轉里數咁抵，入Synergy Supreme+特級汽油個轉換比率先叫做接近啲。

不過自動轉換都唔係冇好處嘅，首先每月自動每5 Smiles積分轉換1里數，唔使儲夠2,500 Smiles積分直接換里數，或1,500 Smiles積分換「易賞錢」積分，可以用盡啲。但當優惠完咗，又要過咗6個月先可以轉返做彈性轉換，取消自動轉換又要1個月，即係有段時間要捱貴兌換比率。

再者，先轉「易賞錢」再轉里數都要做兩次轉換手續，自動轉換係冇咁煩嘅。當然，大家亦可以登記將積分自動轉換成「易賞錢」積分，做少一層手續。不過，若然大家堅持睇到呢度，又或者自己計到呢條數出嚟，相信都係只求賺盡不怕艱辛㗎啦，對不對？

入油簽卡賺里數
入油簽卡都可以賺里數，例如：
東亞Flyer World萬事達卡：$5=1里數
渣打亞洲萬里通萬事達卡：$6=1里數
DBS Black Wolrd MasterCard：$6=1里數

假設入$2,000油，分別用自動轉換優惠同「Smiles積分>易賞錢積分>里數」換里數，計返可以賺到幾多里數同埋比率，等大家可以比較下。留意返以上計算係直接以比例計，撇除咗要用指定數量Smiles積分 / 「易賞錢」積分先可以換里數嘅規定。