京都踩單車路線 鴨川－祇園－八坂神社－先斗町

好多人去京都都係試著和服、買抹茶產品，其實仲有另一種遊京都嘅方法，就係租單車喇。呢個亦係我人生checklist一直想完成嘅大事呢！當中最想就係喺鴨川兩旁邊踩邊睇風景，雖然依家係冬天，四圍冇櫻花、紅葉陪襯，不過京都日常風景已經夠感動人心喇。

路線：

1.於Rent a cycle EMUSICA租單車

2.鴨川

3.茶寮都路里

4.花見小路 ：Hermès ×京都 pop up shop

5.八坂神社

6.鴨川先斗町 － ザ・洋食屋　キチキチ

7.還車
 

上網有唔少京都踩單車路線，而今次我嘅路線係圍繞祇園一圈，擺咗唔少時間去欣賞主角－鴨川，可以沿途慢慢欣賞京都風景、食嘢、逛逛店家同八坂神社。
 

1. 於Rent a cycle EMUSICA租單車

 

揀Rent a cycle EMUSICA四条河原町店租單車因為貪佢夠近鴨川，佢同鴨川只係一街之隔，超級方便。如果可於當日8點還車就只需500yen，如果第日朝早10點還就要750yen，除咗租金之外，每架車仲要畀2000yen按金。如果超過8點還車可以打畀店家，店家最夜會等到你10點，但就要加250yen喇。另外，長租價錢係一星期2000円、兩星期2500円、一個月3000円，按金同樣係2000yen。

店主識英文，所以溝通絕對冇問題，當時仲有唔少外國人嚟租車。店內有50-60架單車畀大家選擇，我就揀咗Sharp醒嘅Tiffany blue。

 

租車時必須要填嘅契約書，填寫基本資料就可以了。如果係外國觀光客租車，就必須出示護照。而收據一定要妥善保管，因為還車時要靠收據退按金。店員會簡單介紹一下點操作單車，服務幾好。

Rent a cycle EMUSICA四条河原町店

地址：京都府京都市下京区斎藤町140-9 ナミイタアレ会館1F

TEL：050-1035-5316

網址：http://emusica-dmcy.com/

 

2.鴨川

 

好喇好喇可以出發喇！搵到到通往河岸嘅小斜坡就可以落鴨川。鴨川代表住京都，係一條長31公里嘅河川，起源係賀茂川，來自京都北部山區，直到出町賀茂大橋一帶同東側嘅高野川合流後，就成為鴨川。鴨川河水非常清澈，穿過京都中央，同京都人日常生活息息相關。兩邊料理店會喺夏天於河上擺納涼平臺招呼客人，唔少人喺河邊傾計或者買嘢食喺度坐，非常悠閒，如果香港有個咁嘅地方畀人放空就好喇。接近0污染嘅河水加上兩岸京都風景令人心曠神怡！

 

 

鴨川又長又闊，普通相機影佢好難拎盡全景，不過覺唔覺呢幾張相特別Wide？哈哈我帶咗 CASIO EX-FR100「分體自拍相機」(鳴謝CASIO 贊助)，有16mm 超廣角鏡頭，影到遼闊嘅風景，拎去旅行就啱晒，同朋友＋靚景自拍冇難度，唔再怕做揸機嗰個啦，因為超廣角咁Wide，點影都唔會顯得面大。當中「智能間隔拍攝」模式可以快速連續拍攝，仲識自動挑選兼儲存最佳影像，玩戶外活動或手殘人士唔怕出現「鬆、郁、朦」嘅地震級相片。

 

最驚喜係佢仲識得分體！鏡頭同 3 吋 92 萬像素輕觸式 LCD 顯示屏可以一分為二，好似呢張相咁我拎住鏡頭，而同事就遠遠拎住顯示屏， 非常靈活，咩刁鑽角度都拍到。聽講仲可防水濺、防塵、防寒同防撞！啱晒去旅行或者戶外活動用。老老實實個 「美顏 Make up Plus」功能影到我皮膚好滑咁，因為當中有12 級選擇嘅「平滑肌膚」，影到肌膚自然地滑溜，膚色亦顯得嫩白，假素顏冇難度。旅行中最大Concern一定係Post相上IG啦，CASIO 獨家研發嘅EXILIM Auto Transfer 功能就Fit晒喇，連接智能裝置後，一影相就可自動傳到手機，隨時隨地都可以打卡啦。

 

鴨川位置：

鴨川好長，橫跨七条、祇园四条、三条等等車站。

我今次於祇园四条出站，一出就已經見到鴨川。

 

3. 茶寮都路里

 

 

茶寮都路里入口。

運動得咁上下就肚餓喇，我決定去同京都和中村藤吉齊名嘅抹茶甜點名店「茶寮都路里」。由於呢條路好多人，終日嚴禁踩單車, 所以我落車推車行。茶寮都路里於京都有三間分店，不過祇園呢間先係本店。我點咗招牌特選都路里聖代 (1,178yen)同都路里善哉(1,102yen)，係幸福到升天嘅美味呀！詳細就要留意之後嘅Blog，因為我想再作詳盡賽後report。

特選都路里聖代 (1,178yen) 只能說裡面啲配料配合得天衣無縫，一啖濃一啖淡，好有心思。

都路里善哉(1,102yen) 紅豆控X年糕控可以喺冬天食到呢碗極品，表示超滿足。

 

茶寮都路里
地址：京都府京都市東山区四条通祇園町南側 573-3 祇園辻利本店 2階・3階
電話：075-561-2257
時間：星期一至五 10:00－22:00(L.O. 21:00)
星期六、日，假期10:00－22:00(L.O. 20:30)
網址：http://www.giontsujiri.co.jp/saryo/

 

4.花見小路：Hermès 祇園店

 

食完甜品後繼續向前行，好快就見到花見小路入口。呢條花街以藝伎聞名，街上有很多日本料理店、茶屋、酒吧，甚至有劇場！喺度散步都幾悠閒，好似返回古代。聽講呢度有啲茶屋、日本料理店要有熟客帶領先可以進入呢。

 

 

 

近來花見小路最矚目嘅莫過於Hermès開設嘅期間限定 POP-UP STORE 「大丸京都店 祇園町家」。由建築鬼才鬼木孝一郎設計店面，而呢間限定店開到至 2017 年 7 月 31 日咋，會去京都嘅朋友記得朝聖。

花見小路
地址：京都府京都市東山区四条通

Hermès 祇園店
地址：京都府京都市東山区祇園町南側 570 番地 8
時間：11:00～19:00(逢星期四休息)
限定期間：2016年11月3日－ 2017年7月31日

5.八坂神社

 

離開花見小路就向八坂神社前進。聽講係京都香火最旺的神社之一呢，不容錯過！雖然之前已經嚟過，不過經過總會想入一入去沾下靈氣。八坂神社供奉咗「スサノオノミコト」同「クシナダヒメノミコト」兩夫妻，佢哋感情好好，令八坂神社成為祈求戀愛嘅聖地。最神奇係神社裡面嘅『美御前社』會湧出美容水，傳說可以令女仔愈來愈靚，只要將美容水輕拍面孔，就可以令皮膚保持健康。

 

裡面有啲小攤檔，呢檔賣水晶飾物，價錢唔貴，由一百港幣起。

 

呢檔賣生日卡。

 

 

好多一家大細齊齊祈福。

 

買靚靚御守做手信都不錯。

八坂神社
地址：京都府京都市東山区祇園町北側625番地
電話：075-561-6155

 

6.鴨川先斗町 － ザ・洋食屋　キチキチ

 

時間又咁快去到黃昏喇，由於我Book咗京都名物 – 神級蛋包飯，於是雞咁腳由八坂神社踩去先斗町，仲可以再一次途經鴨川，真係心曠神怡呀！去到先斗町記得唔好踩單車喇，落車推車或者入去前泊咗車先。ザ・洋食屋　キチキチ隱身喺先斗町小巷中，要花少少時間去搵，所以Book咗嘅朋友預早少少搵路比較好，費事遲到令店家留下壞印象啦。神級蛋包飯 (ふわふわ卵の逆さオムライス)有全份(2500yen)同埋半份(1350yen)選擇，我點咗全份。可以坐定定望住神級蛋包飯誕生真係好感動！店主生鬼又搞笑，全店氣氛好好。味道當然係非一般好食，不過又要賣關子喇，想了解更多就要留意之後啲Blog了。

 

餐廳係Open Kitchen 設計，可以直接欣賞店主廚藝。

 

好食到我食晒成碟，一粒飯都唔剩。
 

ザ 洋食屋キチキチ

地址：京都市中京区材木町185-4

電話：+81 75-211-1484

網址(可網上預約)：http://kichi2.net/

7. 還車

食完飯大約晚上7點幾喇，係時候返Rent a cycle EMUSICA還單車，只要畀返收據店員就可以拎返押金喇。然後可以慢慢散步欣賞京都夜景，完美嘅一日呢！下次我都會選擇踩單車遊京都，一來大家對踩單車都好包容同禮讓，二來我想挑戰再遠嘅地方呢。

沿途美景：

 

 

 

 

 

京都踩單車禮儀

－大家可以於行人路上踩單車，但最好以行人優先，如人多就要落車推車行

－如果喺馬路上踩單車，應喺車道左側踩，唔好喺車道右側踩

－京都馬路上司機都好禮讓，不過最好都係喺行人路踩啦，始終可能未慣外地馬路規則嘛

－如果要泊車，記得要上鎖，同埋停喺禁區就會被拖走㗎喇

－禁止並排而行

－禁酒後踩單車

－禁踩單車聽歌同用電話

－禁單手騎單車

－四条烏丸至八坂神社之間段馬路 08:00-21:00 嚴禁踩單車，中間嘅行人路係終日嚴禁踩單車（包括四条通祇園商店街）。
而先斗町亦係終日嚴禁踩單車，大家好似我咁落地推單車就可以了。