一年換到兩套日本機票？八達通「好易畀」儲里數賺回贈

話說八達通「好易畀」剛剛出咗銀行戶口轉賬功能，可以由「好易畀」戶口轉錢去銀行戶口套現，我剛剛都寫咗篇Blog介紹過。心水清嘅你應該會諗到，既然而家可以套現，咁由八達通卡過數落「好易畀」戶口再過落銀行戶口套現，用信用卡幫八達通卡自動增值就可以賺到里數或現金回贈。究竟呢個方法點樣操作呢？又可以賺到幾多里數或回贈呢？就同大家研究下。

 

需開立「好易畀」Plus或Pro戶口
而家「好易畀」分3種戶口級別，分別係Lite、Plus同Pro，只有Plus同Pro可以轉錢入銀行戶口，所以必須要申請呢兩個級別先可以玩。申請Plus要上傳身份證，Pro只限有渣打戶口客戶申請。
而每個級別嘅每日交易限額(包括轉錢入銀行) 同每年交易限額 (包括由八達通轉出款項) 都有唔同，Plus嘅每年交易限額係$100,000，即係由八達通轉$100,000出去，Pro就冇呢個限制。另外每個月轉入銀行多過$5,000，超出嘅金額會收0.5%手續費。

 

三張八達通做自動增值
八達通規定每人可以用自己名申請3張八達通卡做自動增值，而每張八達通卡每日只可以自動增值一次，所以以個人計，每人每日可以由八達通過3次數，每次$250 / $500，視乎係邊間銀行。
八達通網頁有各銀行嘅自動增值金額表。以簽賬自動轉Asia Miles里數，或換里數唔使手續費既嘅卡為例，東亞Flyer World萬事達卡同渣打亞洲萬里通萬事達卡可以自動增值$500，Citi PremierMiles信用卡自動增值$250。

 

可賺獎賞計算
以下會分別以賺里數同賺現金回贈做例子，假設用以下呢啲卡做八達通自動增值，當中唔包括出新八達通卡嘅按金同埋首次增值費用。賺里數可以唔同嘅里數卡，除咗用晒同一種里數嘅卡，亦可以將其中一、兩張卡換做第二種里數嘅卡，賺啱自己用嘅里數。

 

賺取里數
首先講咗賺里數先，Pro戶口每日轉一次，每個月轉30日，每張卡可以賺到：
東亞Flyer World萬事達卡：100里數 ($500) x 30=3,000里數
渣打亞洲萬里通萬事達卡：83.3里數 ($500) x 30=2,500里數
Citi PremierMiles信用卡：31.25里數 ($250) x 30=937.5里數
每月一共6,437.5里數，每年一共77,250里數，夠換2套日本機票 (30,000里數 x2) 同1套台灣機票 (15,000里數)。

每日轉$1,250，每個月轉30日，一共$37,500，當中有$32,500要收0.5%手續費，
每個月手續費就要俾$162.5，每年就要俾$1,950。
用$1,950換嚟77,250里數，即係大約$0.027=1里數。

Plus戶口每年可以由八達通轉$100,000出去，每次$500要做200次 (日)，當用東亞Flyer World MasterCard，可以賺到：
100里數 ($500) x 200=20,000里數。
當分12個月轉$100,000 ($10,000 x 8 + $5,000 x 4)，當中$40,000要收手續費共$200。
用$200換嚟20,000里數，即係大約$0.01=1里數。

如果以唔使俾0.5%手續費為前提，每個月轉$5,000，用東亞Flyer World萬事達卡 ($5=1里數)，每個月做10次，賺到1,000里數，一年都有12,000里數。

 

想儲英航Executive Club Avios都得，但係要留意，匯豐卓越理財信用卡換Avios要俾$300年費。計算方式同上面差不多，就用其中3張卡直接出個表俾大家參考：

 

賺取現金回贈
到現金回贈，Pro戶口每日轉一次，每個月轉30日，每張卡可以賺到：
大新One+信用卡：$5 ($500) x 30=$150
安信EarnMORE白金卡：$5 ($500) x 30=$150
渣打行政人員白金信用卡：$5 ($500) x 30=$150
每月一共$450，每年一共$5,400

每日轉$1,500，每個月轉30日，一共$45,000，當中有40,000要收0.5%手續費，
每個月手續費就要俾$200，每年就要俾$2,400
扣返都有$3,000，以價值計似乎儲里數抵啲。

Plus戶口每年可以由八達通轉$100,000出去，每次$500要做200次 (日)，用其中一張1%回贈嘅卡可以賺到：
$5 ($500) x 200=$1,000。
當分12個月轉$100,000 ($10,000 x 8 + $5,000 x 4)，當中$40,000要收手續費共$200。淨賺$800

又如果唔想俾0.5%手續費，每個月轉$5,000，用任何一張1%現金回贈卡，每個月做10次，賺到$50，一年就有$600。

 

潛在風險
以上條數就係咁計，實際上你要有恆心每日重複做八達通卡>「好易俾」戶口呢個動作3次 (可以儲夠$10,000先轉落銀行戶口)，風雨不改。同埋當經常都有同樣動作，銀行可能會懷疑你嘅動機，認為你濫用，隨時取消你所賺到嘅獎賞，甚至取消埋你張卡，仲要蝕埋0.5%手續費，到時真係嘥心機捱眼瞓，所以各位要衡量下呢個潛在風險先好玩。