趁後生創業 融資有門路
更新日期: 2014 年 12 月 19 日
讀完書出嚟打咗幾年工，累積咗一定經驗同本錢，有人會考慮自己試下創業，出去闖下。不過做生意樣樣都係錢，需要一大筆資金，就算幾個Friend夾份都未必夠。除咗各種銀行私人貸款，而家政府同某啲機構都有幫年青創業者提供資助計劃，可以借到一筆資金，開始業務或者營運週轉。
小型貸款助創業
香港按揭證券有限公司同銀行、非政府機構合作推出小型貸款計劃，協助小型創業同自僱營商。參與計劃嘅創業者需要提交創業方案同接受創業營商培訓，正式申請後亦需要通過評審小組面試，先可以借到錢。開始生意之後，亦要由非政府機構或營商導師跟進公司發展情況，如果喺經營上有乜問題，佢哋會提供意見或支援。
申請資格：18歲或以上，持有有效香港身份證或「單程證」人士
申請要求：
－在香港以獨資、合夥業務或有限公司形式經營
－業務由多於一人擁有(上限為兩人)，所有合夥人或股東必須共同申請貸款
申請小型創業貸款：未開展或開展少於5年的業務
申請自僱營商貸款：任何自僱經營業務
申請流程
最高貸款額：$300,000 (小型創業貸款) / $200,000 (自僱營商貸款)
年利率：不高於9%，如有合資格第三方擔保則不高於8%
還款年期：1年至5年
還款安排：
1年還款期，首3個月延期還本
2 / 3年還款期，首6個月延期還本
4 / 5年還款期，首12個月延期還本
延期還本期內只須繳付貸款利息
其他支出
除咗貸款嘅利息，申請時亦可能有其他支出：
－信貸報告申請費用
－商業登記及公司註冊查冊費用
－創業營商培訓學費
創業啟動金作起動
香港青年協會嘅香港青年創業計劃可以為創業者提供最多$100,000創業啟動金、創業支援、諮詢等資訊。
申請資格：18至35歲香港永久居民
申請要求：
－一年來開業或已開業少於三年
－公司於香港註冊及以香港為主要業務營運地點
－獨資或合資經營
截止日期：一般為每年3月15日、7月15日、11月15日
申請流程
申請小貼士
以上兩個計劃都係會睇申請人嘅創業計劃書，亦要經過面試，審核創業大計可行性同埋申請人嘅創業熱誠同態度。除咗創業理念要行得通，一個詳盡嘅創業計劃書，清晰列明業務大綱，營運收支預算，前景預測等資料亦係不可缺少。面試時亦要清晰向評審團解釋業務上嘅細節，盡量考慮各種營運上可能出現嘅問題同解決方法，到時就唔使俾評審團問到口啞啞，亦可以俾佢哋感覺到你有充足創業準備。
信貸保證擴充業務
當生意上咗軌道，想擴充,可以向銀行或財務機構申請政府資助嘅中小企貸款計劃。
中小企融資擔保計劃
中小企融資擔保計劃由香港按揭證券有限公司提供五成、六成或七成信貸擔保，最多借到$12,000,000，喺2015年2月28日前「特別優惠措施」之下，可以做到八成信貸擔保。
申請資格：在香港有業務運作至少一年的企業，以及具備良好還款記錄
貸款形式：有期或循環
最長還款期：5年
年利率：最高10%
擔保年費：0.5%至3.2% (五成、六成或七成) / 0.5%至1.0% (八成)
擔保費繳付方式：一次過或逐年
中小企業信貸保證計劃
另外，政府工業貿易署亦推行中小企業信貸保證計劃，向銀行借錢添置營運設備或器材，或作為一般業務用途嘅營運資金，工業貿易署會做擔保。
申請資格：在香港有實質業務運作，員工少於50人(非製造業)或100人(製造業)
信貸保證額：獲批貸款額之50%，最高$6,000,000
最高貸款額：$12,000,000
最長還款期：5年
申請條件：成立18個月或以上的中小企業須提交最新經審核帳目或財務報表，成立少於18個月的中小企業須提供現時信貸及財務資料
申請小貼士
由於每間銀行嘅息口都唔同，所以又係要格下價，而息口會受申請人公司嘅財務狀況影響。