​搭飛機連線Wi-Fi照上網
​搭飛機連線Wi-Fi照上網
相關信用卡:

​搭飛機連線Wi-Fi照上網

發表日期: 2015 年 02 月 06 日 更新日期: 2015 年 02 月 06 日 旅遊
作者:Lady C.

唔知大家搭飛機嗰幾個鐘通常會點過?訓足全程?睇書聽歌睇戲?對於某些上網成癮者,幾個鐘冇得上網,可能會坐立不安,周身唔聚財。不過而家有部分航空公司有提供機上Wi-Fi服務,可以喺飛行途中照樣連住飛機嘅Wi-Fi上網,影完飛機餐同出面嘅雲海都可以即刻Upload上Facebook,唔使忍到去酒店。


主要營運商
航空公司嘅機上Wi-Fi服務會由唔同公司承包營運,例如OnAir同廿間航空公司,香港人比較熟悉嘅有全日空、英航、阿聯酋航空、Qatar、新航、泰航。另一間Gogo就同加航、日航、聯合航空、Delta、美航。不過,一間航空公司亦可能有多個一間Wi-Fi承包商。

收費機制
每間航空公司嘅機上Wi-Fi服務都有唔同收費,基本上係以數據流量或時間計。以Gogo為例,佢分為1小時、全日無限、月費無限。又以個別航空公司為例,星航美元$9.99包10MB流量或$11.95包1小時,日航1小時Plan美元$11.95,24小時Plan美元$21.95。用邊隻就視乎你搭飛機嘅習慣,如果你好似我咁,有2 / 3程訓覺的話,買1小時夠有突。如果你係成癮者,就自己衡量下啦。

Gogo收費價目

日航做緊Promotion,機上Wi-Fi有特價,用JAL信用卡再平啲,不過恒生嗰張冇份。


日航可以用里數換機上Wi-Fi Coupon。

航班、機型有限制
不過要留意,每間航空公司有提供機上Wi-Fi嘅航班同機型都有限制,Gogo嘅Wi-Fi上網就只有美國、加拿大、墨西哥航線提供,日航只有東京至紐約、芝加哥、洛杉磯、雅加達、悉尼、倫敦、巴黎、三藩市航班。

另外,就算嗰條航線有機上Wi-Fi,亦唔係每班機都有,仲要要視乎機型,同埋航空公司對某一機型加裝Wi-Fi設備嘅進度,所以就算航空公司話某個機型有Wi-Fi,都唔代表每一架都有。最主要當然係要視乎航空公司嘅機隊有咩機,而比較常見會有Wi-Fi嘅就有A380、A320、B777、B737。

上網速度及限制
理論上機上Wi-Fi嘅上網速度同一般公共Wi-Fi差不多,不過由於機上Wi-Fi可以係經衛星或者地面訊號連線,所以速度同穩定性要視乎係用邊種方式,巡航高度10,000呎嘅內陸機有可能係用地面訊號,穩定性會低啲。至於巡航高度喺20,000呎至30,000呎嘅長途機或國際性,就會用衛星訊號,穩定性會好少少。

而飛過某啲國家時,亦可能受當地政府限制,可能會暫停上網。通常係飛機升降時都唔可以上網,要等飛機上到巡航高度先可以開始。

如何訂購機上Wi-Fi Plan
喺網上訂機票嗰陣可以一次過訂埋機上Wi-Fi Plan,如果上咗機先心血來潮想上網,亦可以Connect去Wi-Fi,再用信用卡俾錢即時買Plan,就可以即刻上網。

訂Scoot香港飛珀斯機票會有機上Wi-Fi提供。

賺唔賺到信用卡獎賞?
如果係連機票一齊訂,就可以名正言順賺埋信用卡旅遊類獎賞。如果係機上訂,都會計埋落航空公司消費,一樣可以食到旅遊類獎賞,而交易貨幣通常係美元,亦可以揀食外幣簽賬獎賞。

建行(亞洲)eye卡:網上簽賬5X積分 +「賞即飛天地」3X積分=7X積分(減返重疊咗1X基本積分)
DBS Eminent Card:外幣簽賬3%現金回贈
美國運通國泰航空尊尚信用卡:海外外幣簽賬$4=1里數
Citibank PremierMiles卡:海外外幣簽賬$4=1里數
恒生信用卡:海外外幣簽賬3X Cash Dollars