嘉嘉♥過年圍埋食盆菜
更新日期: 2015 年 02 月 02 日
過年食團年飯，親戚嚟拜年開餐，好多時都一大棚人，除咗屋企有工人煮，否則煮一餐十幾廿人嘅飯，會係一項大工程。唔想咁辛苦，好多人會出街食，又或者買一、兩個盆菜返屋企，就可以煮少好多餸，慳返唔少時間同功夫。之前嘉嘉講咗團年飯同春茗有咩選擇，今次輪到講下外賣盆菜啦。
今年嘅盆菜優惠同上年差不多，有做優惠嘅銀行都係夾返上年嗰間食肆。首先睇下今年有邊幾間可以揀先：
如果要有鮑魚，除返開人頭計，應該係大家樂 X DBS嘅鮑魚瑤柱福袋盆菜比較抵，用咗信用卡優惠之後，每人都係$68.8，勁抵喎 (雖然唔知佢啲鮑魚係咩貨色)。而最貴嘅就係名都酒樓 / 聘珍樓 X 上海商業銀行嘅珍饈滿盆，每人要$168，不過佢啲材料亦豐富啲，有成條釀鯪魚，再貴啲嗰個極品珍饈滿盆更加要每人$211。至於AEONCITY X AEON每人$149.7 (6人計)，美心 X 渣打同 X 中銀就要$111.3同$113。
美心 X 渣打最平
上面個$68.8歎鮑魚盆菜都接近最平，不過最平嘅其實係美心 X 渣打嘅金玉滿堂喜慶盆菜，10人份量每人只要$52.8，但睇返啲材料，其實算係將貨就價。
懶人恩物盆菜宴
除咗單一個盆菜，仲可以揀盆菜套餐或盆菜宴，會包多幾樣菜式，例如AEONCITY個原隻鮑魚盆菜套餐，就有龍蝦伊麵、紅燒蝦籽海參、蝦棗蟹棗拼盤、竹笙鮑菇羅漢上素、椰汁鴛鴦芝麻糕，一Set搞掂晒，最啱懶人。