​半價歎珍饈百味

Lady C.久唔久就同啲舊同學、舊同事飯聚，通常都會去任食打邊爐，皆因班大食男子組可以經濟地食到飽，又可以邊坐邊食邊吹水，講下近況。不過總不能每次都打邊爐，要搵下其他地方，抵食得嚟又可以傾餐飽。

最近富臨中銀夾Promotion，十道菜晚市12人套餐有乳豬、龍蝦、燴花膠、沙巴龍躉，打個54折，計埋加一都係$200一位左右。如果唔夠人食套餐，散叫龍蝦、亞拉斯加蟹、元貝、帶子賽螃蟹、乳鴿等等嘅海鮮同小菜都有優惠，人少少都可以食平啲。想豪啲又有陶源酒家嘅黃油蟹鮑魚套餐，48折減到每位$660，不過Lady C.我就食唔起喇。提提大家，要食呢個優惠係要預先訂位，同埋講明用優惠，唔好諗住Walk-in或者去到埋單先拎張卡出嚟。