Rubber Duck咁Hit,唔抽下水我都唔叫做水公主啦係咪?

         (圖片轉載自AllRightsReserved)Rubber Duck個Pat Pat若隱若現真係好性感呀(尖叫)
我承認自己都係半個鴨迷。之所以話係半個,係因為我瘋狂地「追星」之餘(其實都只係追下Facebook 相),同時亦都會反思下,呢隻野除左CUTE到爆之外,仲有咩吸引力呢?點解我留意到隻鴨先,先知原來西九有舊「屎」展出緊,而唔係掉返轉?
細個有幾多個人係有入浴鴨陪沖涼?特別鐘意鴨呢類動物?NO NO NO。
我諗香港人之所以咁留意佢,或多或少係一種羊群心理效應。人影我影;人講我講;人踩我踩;人買我買;人炒我炒……慌死蝕底,又驚被其他人串「WOW!Old news is so….」。當然,不得不提仲有本地大量醒過高倫布布布布布布布既商家,不停提住隻鴨,再搵名人出黎撐下場,等個熱潮duck以(或得意或得以)維持,再乘機推出鴨仔精品、鴨仔全餐……咦,點解冇人順便SALE埋北京填鴨?定係我眼盲?
有錢搵,邊度仲得閒研究隻鴨背後有咩象徵意義先?愛與和平?當一隻只係有觀賞用、沖涼用既原型橡膠鴨都可以炒到上2千8百大元,我就話係現實同幻想既距離,會嚇你一跳就真。現實邊會好似《IRON MAN 3》咁,無論點打點嘔血點燒錢,主角永遠都係不死身兼一定有大團圓結局先(拿拿拿,我冇劇透架,呢D係美式英雄片既金科玉律黎)?事實係,我眼見鴨鴨被圍了(圍欄)、鴨鴨限量貨品沽清了;炒家笑了、鴨鴨污糟了、鴨鴨漏氣了。 Who cares?大家茶餘飯後既話題,咪又係一瞬間轉移左去嘉欣BB果句「佢係我男朋友黎架」 + 零秒爆眼淚既精湛演技上。我都唔想諗得咁負面,不過呢個世界,就係咁多sad but true。
         
                                             嘉欣BB因此一役又再有機會重登女神榜首
慣例P.S. 昨日官方出左個Facebook Cover Set免費同大家開心share,有興趣就自己google下啦。(利申:已下載)
====
【頭盔】(<<有頭盔都已成慣例)以上言論只代表個人立場。水公主只係一介鐘意抽水的小平民,可能同咁多位讀者大人的意見唔同,要打要鬧,求手下留情。