大家去旅行會搭咩交通工具去機場?單拖去或同朋友去,各自由屋企出發,不外乎巴士、機鐵。如果係一家人去,搭的士似乎會方便啲。如果唔搭的士,都可以用信用卡Book車,直接載去機場或由機場搭返屋企,舒服過搭的士之餘,仲可能會抵啲。

 

需要預早預約
的士可以即時喺街邊截車或者Call車,不過用信用卡Book車就要預早預約,通常要2至5日。而每間租車公司嘅車隊有幾多部車都唔同,所以最好再預早啲Book,有啲可以提前30日預約,特別係旺季或長假期,避免Book唔到車。

 

4座位或6座位車款
睇返幾間租車公司都係提供平治S系 (4座位) 或豐田Alphard (6座位),如果4人或以上,租車公司可能會安排7人車,咁就唔使分兩架的士,又夠位擺行李。通常派邊一款車係由租車公司決定,有啲租車公司亦可以指定車款,但可能要加錢,由$50起。

 

收費項目
每次接送服務嘅收費已經包咗行李費、燃油費、隧道費、過橋費,不過中途停車點、等候過咗指定時限 (由航班Delay導致就多數唔計)、或者凌晨時段接送都要額外收錢。所以如果想同朋友一齊搭車,最好就約埋同一個地點上車就會抵啲。

 

惡劣天氣或取消預約
遇上惡劣天氣,除咗航班會取消或延誤,預約租車亦會一樣,當預約搭車時間正好係黑色暴雨、八號或以上風球期間、或除下風球或黑色暴雨警告嘅2小時內,租車公司可能會自動取消預約。

 

 

 

 

預約流程
1. 打電話 / 填表Send電郵去指定租車公司,如果有簽賬要求,需要提供埋相關資料,例如月結單副本
2. 提供日期、時間、人數、航班編號
3. 租車公司安排好之後會打電話 / 電郵確認預約

 

的士抵定係Book車抵?
唔計Call的士或8折的士,正常嚟講跟返路程遠近跳錶,根據香港機場網站嘅資料,搭的士去機場,包括隧道費同收費道路費,未包行李費,油尖旺要$240、九龍東$260-$285、港島區$285-$385、新界區$260-$345 (新界的士$250-$390)。而租車由$250起跳,價錢上九龍區其實兩者差不多,港島區或新界區就會比較抵。

不過其中一間租車公司會用分區收費,新界或港島南區要$442,價錢比較貴。另外如果係用DBS Eminent Card,每階段 (3個月) 累積簽夠$100,000就有6次免費,呢個應該係最抵。

當2個人、2個行李喼由觀塘出發去機場:
的士:$270 + $10行李費 = $280
Uber:$230-$300
銀聯雙幣鑽石卡 / 渣打銀聯雙幣白金卡:$250
Visa Infinite卡:$338
匯豐卓越理財信用卡:$250
東亞顯卓理財World萬事達卡 / World萬事達卡:$300
DBS Eminent Card:免費
DBS Black Card:$650