跨境港幣交易手續費幾時出現?

到底跨境港幣交易手續費(Fee for Cross-border Transactions in Hong Kong Currency)幾時先會出現嘅呢?簡單而言,基本上情況有兩個:

  1. 你消費個間商戶係「海外註冊商戶」,而響埋單個陣係用「港幣」找數。最常見例子就係網購同埋旅遊預訂酒店網站。
  2. 響外地消費,你揀咗(或商戶選擇)唔用當地貨幣找數,而選擇咗用「港幣」找數。

一般而言,一係就唔收你錢,一係就大約收你每筆交易1%手續費,有部份銀行就話呢個收費係Visa或Mastercard向銀行收取。(睇到呢度,人們不禁要問:咁以後用銀聯咪得囉?理論上係可以咁理解嘅,不過銀聯匯率就相對無咁抵啦!)
小編搵到一份富邦銀行響2015年嘅公告,當中所指嘅1% Fee relating to Settling Foreign Currency Transaction in Hong Kong Dollars其實可以理解為「跨境港幣交易手續費」,有興趣可以睇睇:富邦銀行公告
 

針對跨境港幣交易手續費,有何解決方法?

簡單而言,方法有三:

  1. 如果你響外地消費的話,就非常簡單,記得埋單個陣大大聲同店員講,「唔好用港幣收我錢呀!」(請自行google translate返當地語言!:)
  2. 如果係網購緊或者訂機票酒店間個陣,就要首先google問網友,或者去我地討論區問下各位信用卡達人,確認下間商戶係咪「海外註冊商戶」;(有會員超級好人,一直有update一份海外註冊商戶清單,有興趣可以睇睇:海外註冊商戶列表);
  3. 間野係「海外註冊商戶」的話,咁就要做個精明消費者啦,就係用一張唔收跨境港幣交易手續費嘅信用卡!

信用卡跨境港幣交易手續費一覽表

其實大家每逢申請信用卡個陣,銀行都會送份「信用卡服務收費一覽表」畀你睇(無錯,就係好多字,好多人睇都唔睇就送佢去堆填區個份!),申請Visa同Mastercard嘅朋友就要特別留意一下「 外幣交易及跨境港幣交易收費」、「以港幣支付外幣簽賬的有關費用」或者「在香港以外地區以港幣簽賬的費用」等等字眼嘅呢幾欄,會寫明張卡會唔會收跨境港幣交易手續費!下表僅列部份銀行收費:

銀行 跨境港幣交易手續費
美國運通 0%
Citi 花旗 0%
星展 0%
滙豐 0%
東亞 1%(VISA及Mastercard)
中銀 0.95%(Mastercard)
中銀 0.8%(VISA)
建行(亞洲) 1%(VISA及Mastercard)
大新 1%(VISA及Mastercard)
富邦 1%(VISA及Mastercard)
渣打 1% (Mastercard)

講到呢度,係咪驚覺原來有唔少銀行都有收跨境港幣交易手續費呢?唔使驚嘅,只要識得申請一張唔收手續費嘅信用卡,咁以後網購、外遊或訂酒店個陣,就唔使查來查去佢係咪香港註冊公司,又或者驚佢用港元找數,信用卡無啦啦收你1%啦!
*順帶一提,星展DBS雖然唔收跨境港幣交易手續費,但寫明「香港以外的銷售點(就網上交易而言,指商戶的登記及/或結算所在地)所進行的港幣交易,並不計算為合資格簽賬或外幣零售簽賬」,一句到尾,即係你唔會有積分賺!

 

以下精選咗幾張唔收跨境港幣交易手續費嘅信用卡:

 

Mileslife為何收跨境港幣交易手續費?

最後講返Mileslife 啦,佢響8月中正式登陸香港,先推額外4倍里數,又送100萬英航里數Avios咁,唔少人都好開心,事關又多一個途徑可以一簽兩賺,賺完信用卡積分,又可以賺埋航空公司嘅飛行里數(重溫Mileslife 創辦人訪問文章)。不過隨住信用卡翻月結單啦,有部份人就唔多開心,事關發現原來用Mileslife 個App找數係會收跨境港幣交易手續費。
 

mileslife APP截圖
細心睇Mileslife App響最下面個句英文,係有提過大家會收cross border transaction fee的喔!

 

其實呢個問題早響4月個陣,Mileslife仲未正式強勢登陸香港之際,有會員已經響討論區提過「響香港食飯用Mileslife俾錢收咗overseas transaction fee」。事關Mileslife嘅收款註冊地係SG,亦即係新加坡,亦即係「海外註冊商戶」,亦即係部份卡會收你收跨境港幣交易手續費!所以,以後要記得用唔收跨境港幣交易手續費嘅信用卡啦!

*最後提提大家,以上資料僅供參考,如有爭議,一切以銀行最終決定為準(本文更新至2018年8月31日)