如果唔計星期二或早場,而家一張戲飛閒閒地都要八、九十蚊,每個月睇得兩、三套,仲要買埋另一半張飛,積少成多都幾重皮。今次就同大家講下信用卡睇戲優惠,慳返啲戲飛錢。

 

首先睇咗今年戲院優惠先:

 

UA院線
星期一至五 (星期二及公眾假期除外) 正價戲票9折
信用卡:匯豐、恒生、星展、中銀、大新、Citibank
優惠不適用於電話、手機App、網上購票、包場同團體訂票,以及所有VIP戲院

 

MCL院線 X EPS
優惠期至:8月10日
戲院票房購買正價戲票9折
優惠不適用於全景聲電影、Festival Grand Cinema之BEA Festival Suite及其他特別版本之電影戲票

 

MCL院線 X PPS
網上購買正價戲票9折
優惠不適用於全景聲電影、Festival Grand Cinema之BEA Festival Suite及其他特別版本之電影戲票

 

MCL院線 X 工商銀行
其實喺MCL官網仲有一個「工商銀行」信用卡買2D / 3D正價戲票9折優惠,今年4月30號到期。我見佢寫「工商銀行」而唔係「工銀亞洲」,就諗會唔會係中國工商銀行嘅優惠。打去MCL問,佢話係香港工商銀行嘅優惠;但喺工銀亞洲官網搵唔到相關優惠,只有指定信用卡買飛買一送一,再打埋去CS問,亦都話冇呢個9折優惠,只有買一送一,建議去到票房買飛時問一問先。

到底有定冇優惠㗎?媽,我好亂呀!

 

時間或日子有限制
雖然有唔少優惠都係全年優惠,但所謂嘅「全年」,其實係唔包括星期二、早場、優先場、大時大節、或者電影節之類嘅特備節目。

 

指定買飛方式
唔同優惠對應唔同買飛方式,去戲院票房直接買當然冇問題,但經戲院官網、戲院官方App、電話訂飛就唔一定有優惠。

 

3D電影未必有優惠
有啲優惠指明只係2D電影有優惠,唔包括3D、全景聲、4DX、時間特別長嘅電影。另外有啲戲院或者細細間、得二、三十個特別位嘅VIP影廳,亦冇得用優惠。

 

好用優惠推介
American Express X 百老匯、PALACE、AMC
指定信用卡3D同2D戲飛有85折之外,高級啲嘅卡逢星期四、五仲有買一送一。

東亞 X UA
東亞World萬事達卡有8折,IMAX、全景聲版同VIP影廳戲飛都包。

Citibank X Cinema City朗豪坊
買4DX戲飛只有Citi Clear Card有9折,而且經戲院網站、手機App或自助售票機買都有折,比較方便。

 

積分換戲飛
如果儲落信用卡積分唔換里數或現金回贈,換戲飛可能仲抵。例如Citibank 10,000分換MCL 1張2D戲飛,15,000分換1張3D戲飛;東亞30,000分換2張MCL或UA 2D電影禮券。1張飛平均$85-$105計,係抵過平時25,000分先換到$100現金券或回贈。