買零食除咗去阿信屋之外,大家仲會去邊到買?
其實大至百佳惠康嘅超級市場,小至優品360、アメ横丁、松坂庫嘅新式零食連鎖店,仲有HKTV Mall、零食大王嘅網上商店都各有特色。到底應該點揀呢?
雅軒第一次寫BLOG,就試下用3個唔同嘅角度去分析下啦~

1. 方便
2. 優惠,價錢
3. 種類

1. 方便

據網上統計:
759阿信屋 現有247間
百佳 約306間
惠康 接近300間
零食物語 約60間
優品360 現有35間
アメ横丁 約8間
松坂庫 約3間
HKTV Mall 有電腦既地方均可
零食大王 有電腦既地方均可

依雅軒目測,雖然超級市場嘅數目遠遠拋離其他連鎖零食店,但係分店位置真係好重要,阿信屋除左滲入各大型屋苑外,地鐵站同旺區都總有一間係左近,連 iSQUARE入面都有一間,總之你想食就有得買。而個人認為アメ横丁同優品360定位都唔錯,開係尖沙咀同旺角絕對有開一間頂十間嘅感覺。

2. 優惠/價錢

值得留意,零食店和超市係標價上相差不大,但零食店一般提供會員優惠。
阿信屋個7,8,9折一定唔陌生,雅軒入親去仲要睇埋正價,公價,街坊價和熱賣價,睇到頭都大埋,好多時都係個職員幫我計先知道幾錢,會有少少亂的。相反其他簡簡單單寫個減後嘅價錢就清楚好多。

另外,松坂庫亦有會員制度,會員平均有九折優惠,部分400元以上嘅商品,就有八折。而零食大王就有限時搶購同零食十蚊店這類長期優惠,偶爾都有不少好貨。所以只要你有心機睇,上網留意店舖不時推出嘅優惠,都一定會買到平貨。

價錢方面,對比幾家連鎖零食店同超市,包括優品360、松坂庫、759阿信屋、零食大王、惠康及百佳,發現同類型貨品價錢竟可相差近一半。

例如:

POCKY固力果家庭裝百力滋 (朱古力) 13.6g X 9袋入
759阿信屋 $16.0
百佳 $19.9
惠康 $19.9
零食大王 $16.0

瑞士三角迷你袋裝朱古力200g (獨立包裝) 約15粒
百佳 $22.9
惠康 $22.9
優品360 $18.0
松坂庫 $28.8
零食大王 $26.0

而アメ横丁嘅杯裝果肉啫哩,大約五十蚊六杯,都幾抵食。另一款杏仁芝士餅超級市場賣成廿幾蚊,呢度只不過賣$14左右。餅乾芝士味濃,杏仁又香脆,最岩邊睇電視邊食。普遍店內很多商品甚至比阿信屋仲要平一成左右。零食物語和HKTV MALL的零食價錢就偏貴,要等有優惠時先會平過其他。

3. 種類

超級市場方面,百佳和惠康主打香港大路零食,雖然都有外國直送系列,但通常都偏貴
,而HKTV MALL 有較多歐美系零食,雖然價格稍貴,但係非常合理,因為D零食來貨價都要咁上下。

759阿信屋近年入咗太多唔同類型既貨種,今到上架既零食款式比以前少,除非你去到一間好大間先好少少。
アメ 横丁主打日韓零食,例如韓國的MARKET O的朱古力餅乾和BROWNIE、日本的粟米湯波波,果肉啫喱,還有芝士味鮮薯餅,都係外面比較少見到的商品。

優品360除了零食,糧油雜貨都齊曬,都係大路款式,但零食份量比較大,好似批發咁,如果一個女仔去買,揀唔到好多款。不過價錢又平D。
松坂庫/零食物語以高級日本零食為主,幾多禮盒式零食,送俾人就開心D。

零食大王可以搵到好多香港式嘅零食,好似時興隆、珍之味、石頭朱古力同水泡餅都有。新式既日韓、歐美、東南亞零食都有,系列分得幾仔細,買滿$300就有得免費送貨。

雖然很多人的首選都是759阿信屋嘅零食,不過,雅軒認為アメ 横丁嘅零食係價錢最抵,而零食大王就最多款,大家不妨可以一試啊!