今個月頭去咗澳門兩日一夜,大概大家聽到「澳門」都會覺得:澳門有咩好玩呢?今次在澳門,我地就要搵啲你地無去過嘅地方!一連四集《澳門無厘頭》,帶大家去搵好食野、睇靚景,仲去埋新酒店~今次先同大家去搵隱世嘢食!

牛頭皮、牛腳趾、牛鞭 你敢唔敢食?
牛雜大家見得多,食開牛雜嘅朋友,一定試過牛肝、牛腎、牛肺,不過以上呢啲其實好濕碎。係澳門爛鬼樓巷就有一檔開咗40年、街知巷聞嘅牛雜-楊六記,牛雜嘅種類多不勝數,你講得出嘅牛部位,呢度都可以食到;甚至一啲你諗都諗唔到嘅部位,例如牛頭皮、牛腳趾、牛眼皮,楊六記都有,差在你敢唔敢食!

深知攝影師鍾意食牛雜,所以我叫咗碗 $20 細雜比佢,另外再加$10份牛鞭同$5粒牛眼,全部加埋都不過 $35 。開左40年嘅檔口絕對唔係浪得虛名,楊六記的刀鋒俐落,轉眼間一碗細雜已經放係我地枱面。攝影師表示,牛雜食落口充滿膠質,味道淡而清,更大讚牛雜爽口同沒有異味,仲話合埋眼根本唔知食緊牛雜,同香港嘅大有不同!牛眼一拮落去,裡面嘅汁即刻爆晒出嚟,攝影師就飲唔到入面嘅汁,所以想食到最原汁原味嘅牛眼,大家就要成粒食落口!

老闆個樣雖然Cool Cool 地,但絕對係個好人,有問必答。我地坐個半個鐘,有熟客、遊客黎食,當中有位伯伯表示,自己已經食咗幾十年,最鍾意楊六記嘅牛雜毫無膻味,食過好多檔,都係要食返楊六記。雖然位置唔好搵,但如果你鍾意食牛雜,楊六記一定唔會令你失望!

楊六記(★★★★☆ 位置唔顯眼,要細心啲先可以搵到;但勝在牛雜種類多!)
地址:新馬路爛鬼樓巷草堆街橫巷 1B 地下
營業時間:星期一至日 2pm – 6pm

豪食!星滙餐廳自助餐

食完街邊嘅牛雜,想食豪啲?可以揀自助餐。我地去咗澳門新酒店新濠影匯嘅「星滙餐廳」食自助餐!唔知係唔係新開張關係,處理程序未係咁上手。雖然我地預先打咗電話嚟預約,不過去到都係要等。同絕大部分嘅自助餐差不多,雖然味道無咩特別,但勝在款式十分齊全,由中式到西式、由凍食到熱食,應有盡有!食自助餐當然少不了要食生蠔、凍蟹同龍蝦,同我估計既一樣,呢類食物果然十分搶手!不過酒店嘅 refill 速度相當迅速,絕對唔驚無得食~


另外,鵝肝多士都係非常搶手嘅嘢食,由我入座到開始,排隊既人一直沒有減少。當然,我都有排隊,鵝肝果然係入口即溶,香口嘅同時帶黎一份肥膩味;不過,多士則可以去除當中的油膩感,食左一件仔,已經相當滿足,推介推介!

平日嘅自助午餐同晚餐成人價錢分別係 $248 同 $458,不過如果係假日去食,無論午餐同晚餐都要成 $588,似乎就唔太抵食,建議大家揀平日時間去食。

星滙餐廳(★★★★☆ 食物種類多,但略欠特色~)
地址:新濠影滙酒店明星滙二樓2113號
營業時間:星期一至日 6:30am-10:30pm

去片~

=========== ⊙⊙ ===========
如果想了解我多點,不妨到我的 FacebookInstagramYouTube 看看。
多謝瀏覽 ☺ 下回再見