澳門巴黎人酒店有賭廳、水上樂園、商店街、餐廳等等設施,成日足不出戶都唔怕悶。呢度有來自世界各地嘅餐廳,有中式、港式、日式、法式等等。今次就試試澳門巴黎人自助餐廳同澳門巴黎人法式餐廳Brasserie呢2間比較法式嘅餐廳!

1. 澳門巴黎人自助餐廳 Le Buffet

位於酒店大堂嘅澳門巴黎人自助餐廳 Le Buffet係酒店內眾多餐廳嘅人氣之最,價錢大眾化,所以由開幕開始已經好受歡迎!Buffet包羅環球美食之外,最大賣點係有大廚團隊即場用新鮮食材為客人烹調,滿足食欲之餘,亦可親眼見證到美食誕生!而家介紹下Le Buffet豐富嘅自助早餐啦。

 

餐廳環境:

餐廳裝潢優雅,靠窗邊嗰邊樓底幾高,富有空間感。

 

鍾意日光嘅朋友可以選擇餐廳窗邊位置,進行光合作用哈哈,其實餐廳光猛啲,食客會傾向點一啲較健康嘅食物。

 

Buffet區有法式、中式、日式、港式、東南亞區、麵包區、沙律吧、飲品區及穀類早餐,可以滿足到唔同人嘅口味,而家帶大家睇下個Buffet有咩特別啦。

法式:

有齊所有Alldaybreakfast鐵腳:雞肉腸、豬肉腸、煙肉、炒蘑菇、茄汁豆、薯餅、炒蛋,另外大廚會即場煎太陽蛋、奄列,非常新鮮。

法式焗蛋:外表睇落仲以為係甜品,原來係咸點。小小一杯有3層食材,表面係芝士,中層係雞蛋,底層係蕃茄肉醬,口感豐富,個人覺得可以加埋多士一齊食。

麵包:

平時食早餐Buffet,麵包區選擇來來去去都係不外乎嗰幾樣,擺架多士機同果醬畀你自己攪掂,麵包區只係Buffet裡面一個附屬品,係0。但嚟到呢度,麵包區選擇非常多,而且一絲不苛!

聽講麵包係法國人一天嘅開始,因為法國人日常生活中最不可或缺嘅食物係麵包,可以當做主食,又會搭配其他料理食用。Buffet可能依據返呢個傳統,所以擺好多心機落呢度。選擇有丹麥酥、士多啤梨冬甩、朱古力冬甩、法包、提子包、麥包、牛角包、牛油蛋糕、muffin等等。

丹麥酥:外酥內軟,加上甜甜嘅香桃果醬,係味蕾頂尖享受。

 

士多啤梨冬甩:平時好少食冬甩,因為好怕油膩,最驚成手油。呢度出品嘅士多啤梨冬甩唔油膩之餘,冬甩上嘅士多啤梨朱古力甜度拿掐得剛剛好。

 

牛角包:聽講牛角包係法國人早餐恩物。香脆酥軟,口感層層有致,size細細好啱女士淺嚐。

大廚即場炮製嘅Waffle同pancake,refill速度快,而且唔會批量生產,務求令客人食到最新鮮嘅食物,誠意可加。熱辣辣、香噴噴嘅Waffle同pancake加上牛油、果醬已經係夢幻組合,食得出蛋漿真材實料,唔會一口都係粉,Catar!

 

澳門巴黎人自助餐廳 Le Buffet

價錢及營業時間:(好受歡迎,記得要預先Book位呀。)

自助早餐:上午6:30 — 上午10:30 | 週末:上午6:30 — 上午11:00

成人: 澳門幣 208+ | 小童: 澳門幣 104+

自助午餐:中午12:00 — 下午15:00

成人: 澳門幣 228+ | 小童: 澳門幣 114+

自助晚餐:晚上18:00 — 晚上22:00

成人: 澳門幣 368+ | 小童: 澳門幣 184+

地點:澳門巴黎人酒店 一樓,地面大堂

營業時間: 上午6:30 – 晚上10:00

電話: +853 8111 9250

電郵: lebuffet.reservation@sands.com.mo

(若手持渣打亞洲萬里通萬事達卡,於新批核之渣打亞洲萬里通萬事達卡獲發出後首2個月內, 憑該卡累積之首HK$7,500合資格簽賬(根據交易日計算),每HK$0.5合資格簽賬可賺取 1「亞洲萬里通」里數,上限為15,000 「亞洲萬里通」里數。不設最低簽賬要求。所以如果2個人食自助晚餐,每位$368,可賺到1,472里。 )

 

2.澳門巴黎人法式餐廳Brasserie

Brasserie烹調法國不同小鎮的傳統家常菜,以為食法國大餐會好貴?傻啦,Brasserie以相宜價錢提供高質法國餐,Lunch set超抵,畀Mop$188就可以享用到有三道菜嘅午餐。

餐廳環境:啤酒小屋格局,有吧檯、sofa同餐檯。裝飾擺設都幾講究,地板、吊燈、大皮椅都極具法式情調,洋溢浪漫風情。

 

前菜:

香草三文魚:聽講三文魚係自家醃製,好嫩滑,每塊都係厚切大件,份量多到食唔晒呢!配上酸忌廉,十分開胃。

水波蛋露筍煙肉生菜沙律:最抵讚係露筍,翠綠鮮嫩,十分新鮮!將煮得剛剛好嘅水波蛋戳破,半流出嘅蛋液混和生菜,豐富咗口感。另外煙肉好香脆,咸咸香香成功為整碟清淡嘅沙律吊味。

主菜:

牛扒薯條:聽講係Brasserie嘅招牌菜,用咗法國餐桌上常見嘅Hanging Tender牛柳,係整隻牛最軟嫩嘅部分,呢個部分位於腹腔內,唔會被牛隻運動影響到,所以肉質極為柔嫩多汁,脂肪成份非常少。我叫咗7成熟,表層微焦,算有牛味,呢個價錢都係咁啦。扒上嘅乾蔥牛油絕對係成碟菜嘅靈魂,令牛扒更香口惹味!蔡瀾話過乾蔥於法國菜中佔一席很重要嘅位置,好多醬汁同肉類嘅烹調,都會以炸乾蔥為底,再用牛油爆開。

紅酒燴雞:係法國傳統菜,法文名:「Coq au vin」。源於法國勃艮第地區(Bourgogne),因為嗰度盛產靚酒,當地人順利成章以酒入饌,配以與當地最常見嘅肉類-雞,所以成就咗紅酒燴雞呢道名菜。蘑菇、嫩滑清淡嘅薯蓉加上濃味嘅紅酒燴雞,絕對係最佳拍檔。雞脾肉煮得軟腍,輕易就可以將雞脾拆骨喇。

甜品:

經典焦糖布丁:法式甜品表表者一定係Creme Brûlée。一整塊焦糖超香脆,唔似平常甜品鋪hea整得幾片咁姑寒。布丁蛋味超濃,呢個Creme Brûlée係今餐嘅亮點,My favourite!

新鮮水果配青檸雪芭:水果不過不失,雪芭係yogurt味,食到太飽可以食呢個甜品。

 

食過酒店內5間餐廳,Brasserie嘅服務係最流暢、有禮貌同熱情,$188一set3道法國菜加上好服務、靚環境,CP值爆錶!

 

Brasserie

地點:澳門巴黎人酒店 三樓

營業時間:  週一至週日 早上11:00至晚上11:00

(由即日起至2016年10月31日,申請Citi PremierMiles卡,於發卡後首2個月內,可享迎新HK$1.5 = 1里數。持卡人可獲高達 240,000迎新積分(20,000里數);不設最低簽賬條件。若一家三口到Brasserie吃lunch set,每位$188, 可賺376里。)