Sorry,水公主上星期冇交稿,我都知冇咩人期待,但係稿始終都要交,水點都會吹……相信如果我話今個星期熱門話題係TBB個節目——《求愛大作戰》,應該都冇人反對啦可?繼之前套《盛女愛作戰》(個名好似係咁上下),今次攻防逆轉,變做由所謂專業人士精挑細選過既男士力追女神。
雖然之前都可以預見個焦點會移左去(砌)班評審度,但綠魔Karl「風靡」萬千網友既程度真係估佢唔到!水公主見某雜誌Fanpage係咁抽係咁抽(水),終於套野都未播足一星期,已經乾塘。其實呢,水公主好想問,點解好似唔多人討論果個鼻翼縮到好似比個晾衫夾夾住左好多年既女評審?驚佢嬲嬲豬?
          
          呢個世界點解咁奇怪,連愛情都要有專家,乜有方法可以包結婚生仔?如果真係有,水公主我認真跪求陳豪同陳茵薇既幸福方程式!
節目製作目的如何,評審同參賽者的質素也必如何。我唔係想踩低任何人,只係電視台同製作組好明顯係同上次一樣純粹想炒作,明嘲暗諷呢班男女各有缺點,然後有一對(竟然)配對成功,再得出(勁膚淺)既理論——「其實男女各讓一步,就好易有幸福叩門 + 大團圓結局可以跳起yeah同BBQ喇」。唔該哂。

          網絡大典既統計,2012年至少有兩套劇係BBQ結局(圖為《造王者》)
出鏡既男男女女姓甚名誰、生得靚定樣衰、家境學歷、係咪好似大隻張家輝咁係優質潛力股統統都唔重要,最最最最最最最(X10,000)要關心既係有冇話題性!45度SANTINO如是,$128餐蛋飯亦如是。活在資訊爆炸的年代,人人都好似得左痴呆症咁,如果冇本事令人留低深刻印象,下一秒,邊個仲記得你?
P.S. 黎緊升唔升ios 7好呢?睇個設計真係好靚呀!係呀,我都係睇樣先唔好意思。