踏入春天回南天,天氣由乾變濕,天花牆身都濕納納出晒水珠,發晒霉;洗完衫又晾極都唔乾,一陣「噏」味,買部抽濕機擺喺屋企,抽走濕氣乾爽返。至於要點揀一部啱用嘅抽濕機,就等我同大家研究下。

抽濕機種類
市面上抽濕機大致分為三種抽濕原理,分別係壓縮式、熱石式同混合式。

壓縮式
壓縮式係將空氣抽入,經過內有雪種嘅冷管,空氣入面嘅水分遇冷,喺冷管上面凝結成水珠,流入水箱,空氣再經散熱管排出。壓縮式嘅優點在於較為慳電,但抽濕效能就比較易受溫度同濕度影響。

熱石式
熱石式入面有泡沸石製成嘅熱石,具備吸濕功能,將熱石加熱可以排返水分出嚟,儲入水箱。好處在於抽濕效能比較穩定,冇壓縮式咁易受溫度同濕度影響,不過熱石式耗電量比較高。

混合式
顧名思義,混合式就係同時兼備壓縮式同熱石式功能,可以因應環境自動調節吸濕模式,可以話係集兩家之長。

選擇視乎家居環境
首先要視乎屋企地方幾大,如果只係喺100呎嘅睡房用,抽濕量15公升或以下嘅就夠用;如果要喺客廳用,地方大啲抽濕量自然要高啲,300呎就要20公升。同埋要睇下屋企係唔係近海邊、半山等較為潮濕嘅位置。另外,如果想喺廳同房用,最好就揀有轆嘅型號,擺位都方便啲。

水箱容量
水箱容量大啲,倒水嘅次數自然少啲。

附加功能
除咗主要嘅抽濕功能,抽濕機仲有唔少附加功能,例如空氣過濾、防菌、防霉、乾衣、乾鞋等,可以視乎自己需要選擇。

實地測試
一啲大型連鎖電器鋪都有Demo抽濕機,買機時可以睇下有冇Show出嚟,有就開機試下,睇下實際運作時易唔易用,會唔會好嘈。

參考能源標籤
喺香港出售嘅抽濕機,都會有機電工程署嘅能源效益標籤,列明耗電量、抽濕量、能源效率等數據,可以作為參考。另外,一部機可能有兩組數據,可能係按照唔同環境情況而得出嚟,比較時要注意環境情況數據。

能源標籤上抽濕量同能源效率數值越大,代表抽濕效能越高。


操作須知

-擺位時留意風口方向同散熱位置,唔好有嘢擋住。
-開機時盡量閂門閂窗,如果唔係抽極都抽唔乾。
-乾衣時先盡量扭乾,唔好水滴滴,一來乾得快啲,二來免得滴濕部機整壊,同埋唔好直接攤係部機上面,要掛起。
-定期洗水箱同隔塵網。

買機賺信用卡優惠
唔少信用卡都有大型連鎖電器鋪優惠,可以睇下去邊間買著數啲。

Citibank X 豐澤
優惠期:至2月28日(豐澤官網話至到4月30日)
登記抽中5%回贈:
簽$3,000-$6,999每月最高回$250,簽$7,000或以上每月最高回$350,全期最高回$350
登記抽中10%回贈:
簽$3,000-$6,999每月最高回$400,簽$7,000或以上每月最高回$700,全期最高回$700

匯豐 X 百老匯
優惠期:至2月28日
「冬日結伴賞」額外2%「獎賞錢」回贈,加埋最高8%,每星期上限200「獎賞錢」。如果喺時代廣場或屯門市廣場分店,簽滿$500仲可以抽獎。另外仲有「最紅自主獎賞」賞家居加「最紅星期五」11X「獎賞錢」。

恒生 X 蘇寧
優惠期:至2月28日
單一簽賬滿指定金額可賺額外Cash Dollars,每月額外上限$400 Cash Dollars,全期額外上限$1,000 Cash Dollars。
簽賬$2,000-$2,999:額外$50 Cash Dollars
簽賬$3,000-$4,999:額外$150 Cash Dollars
簽賬$5,000-$7,999:額外$250 Cash Dollars
簽賬$8,000或以上:額外$400 Cash Dollars

邊間買機著數啲?
假設我要買一部三菱MJ-E152AF-H抽濕機 (建議零售價$5,580),分別去呢三間電器鋪用各自信用卡優惠就可以賺到:

Citibank X 豐澤
5%:$250回贈 (計出嚟回$279,但上限係$250) + 5,580基本積分
10%:$400回贈 (計出嚟回$558,但上限係$400)  + 5,580基本積分
以25,000分換$100現金券,即係250分=$1計:
5%回贈價值=$272.32
10%回贈價值=$422.32

匯豐 X 百老匯
8%「獎賞錢」:200「獎賞錢」 (計出嚟回446「獎賞錢」,但上限係200)  + 22基本「獎賞錢」
「最紅自主獎賞」賞家居加「最紅星期五」11X「獎賞錢」:244「獎賞錢」
以100「獎賞錢」可換$100現金券,即係1「獎賞錢」=$1計:
8%回贈價值=$222
11X回贈價值=$244
8%+11X回贈價值=$444

恒生 X 蘇寧
簽賬$5,580:額外$250 Cash Dollars + $22基本Cash Dollars
以$1 Cash Dollars=$1計:
回贈價值=$275

根據以上計算,如果抽到Citibank 10%回贈,單計回贈金額都係高過另外兩間,如果只係找到5%,就係恒生抵啲。但係如果匯豐有玩「冬日結伴賞」,5人隊伍去百老匯買嘢有8%「獎賞錢」,夾埋星期五11X會有444「獎賞錢」,僅僅多過Citibank 10%。